Shillong, Kyllalyngkot 02: Ka Khasi Students’ Union (KSU) lyngba kane ka kyrwoh ka pynpaw ia ka jingsngew kmen ka jong ka ha kaba sa shisien biang ka Union Public Service Commission (UPSC) ka la ioh chairman biang da u Khasi. Katkum ki jingioh jingtip, U President ka ri India u la thung ia u Dr. (Prof.) David Reid Syiemlieh kum u chairman ka UPSC myn ha kine ki sngi.
Ka seng ka sngew sarong shi katdei eh ba sa shisien ia ka kam chairman ka UPSC la ioh ban bat da u para doh para snam. Ka sien ba nyngkong eh ba ka UPSC ka la ioh chairman da ki paradoh parasnam ka long ha u snem 1992 ha kaba Ka kong Rose M. Bathew Kharbuli i la shah jied kum ka chairman kane ka autonomous body jong ka sorkar pdeng ha kaba i la long ruh i kynthei ba nyngkong duh ka ri India ban long i chairperson ka UPSC.
Ka jingioh long chairman i babu D. R. Syiemlieh ka long ka burom kaba khraw eh ia ka Ri bad ka Jaidbynriew Khasi baroh kawei bad ka long ruh kum ka khubor kaba bha na ka bynta une u snem thymmai. Ka jingioh jing i ia kane ka kyrdan ka pyni shai ba ki Khasi kim dei shuh ki briew kiba sah dien hynrei ki lah ban jop ia kano kano ka thong lada ki iai minot thop bad shim khia ia ki kam kiba ki don ka sap ka phong.
UDr. (Prof.) D. R. Syiemlieh i la long teng ruh kum i professor ka History Department ka skul bah NEHU, i la bat ruh kum u registrar, Controller of Examination, Head of Department bad Pro-Vice Chancellor ka NEHU, u Vice Chacellor ka Rajiv Gandhi University ha Arunachal Pradesh, u dkhot ka Board jong ka UPSC tad haduh ba in da long syndon kum u khlieh duh ka UPSC. u long ruh i wei na ki riewstad i ba la tih bniah bha shaping ka jingim u Pa’iem Tirot Syiem bad iba lap ruh ia u mot u Thomas Jones ha nongbah Kolkata, West Bengal.
Ka jingioh u Prof. D. R. Syiemlieh ia ka kyrdan Chairman ka UPSC ka long kum ka nuksa ia baroh ki paradoh parasnam bay m don diengpynkiang ba lah ban khanglad ia ki lada ki don kano kano ka jingangnud hynrei ka dei tang ka jingtrei shitom kaba lah ban ialam ia ki sha ki kliar lum jong ka nam.
Khatduh khatwai ka KSU ka ai khublei kyrpang bad kitbok kitrwiang ia une u riew rangbah uba la wanrah nam wanrah burom ym tang ia lade lane ia ka iing ka seng ka jong u hynrei ia ka Ri bad ka Jaidbynriew baroh kawei, ba un iai long uta u nuksa ne ka nongmuna ia ki khun samla ka ri bad ba un dang iai kiew shaphrang ha ki kam ki babha ki jong u.
