Shillong, Nailur 11: Ka Executive Committee jong ka Synjuk ki Nongsynshar Shnong ka Bri U Hyniewtrep (SNSBH) ka la shong jingialang mynnin ka sngi kata, 09.09.2016 bad kane ka jingialang kala shim ia ka rai ban leit ia kynduh ia u CEM jong ka KHADC halor ka VAB.
Ha kaba iadei bad ka VAB, la rai ban thoh da ka Shithi sha u CEM ka KHADC, Bah. P. N. Syiem ban in buh sngi ha kaba ki dkhot jong ka Synjuk kin ioh ban iakynduh ia I bad ki dkhot ka EC jong u ban pynsngew halor kaei kaba la mih ha ka jing iakren bad u Myntri Rangbah ha ka 31.08.2016 bad halor ka jingtyrwa jong u ban pan biang ia ka VAB bad ban sngewthuh ia ka jing ai mut na ka liang ka KHADC ha shwa ba ngin rah ia katei ka rai sha ka General Meeting jong ka SNSBH.
Ha kaba iadei bad ka jingtyrwa jong ka Shillong Municipal Board (SMB) ba pynlong aiñ ia ka Property Tax, ha kaba ki paidbah ki hap ban siew khajna halor ka jingdon ia ka khyndew ka shyiap, ka Synjuk ka pynrem jur bad pyrshah ia katei ka jingthmu jong ka Shillong Municipal Board namar hadien ka jingiatai ba sani bha la sngewthuh ba katei ka ain kan pynkylla nong shongwai ia ki trai jaka trai muluk, ha la ki jong ïing ki sem ki jaka ki puta.
Ha kajuh ka por, ka Synjuk ka kyntu ia ki Nongmih khmat ki ba kin ïeng pyrshah bad kyrshan ia ka rai jong ka Synjuk bad ka dawa ba ka Sorkar ka dei ban pynsangeh syndon ia katei ka ain namar la sngewthuh ba ia katei ka Bill yn sa iatai ha ka iing Dorbar ha kine ki sngi ki ban wan bad lada ka sorkar kam leh eiei bad shim khia ia ka jingdawa, ka Synjuk kam banse ban shim da kiwei pat ki lad ki lynti.
