Shillong, Naiwieng 23: Ka seng khasi mynta ka sngi kala rakhe pyndon burom ia ka “seng kut snem ba 117” hapdeng ka jingphuh jingphing da ka jingiaid paidbah na Mawdan Iewrynhep Nongthymmai sha madan Weking ha ryngkat ka riam ka beit nylla.
Ka jingrakhe ia kane ka Seng Kut Snem ka long ban kynmaw burom ia ki 16 ngut ki riew rangbah mynshwa kiba la ieng rangbah ban iada ia la ka jong ka Jaidbynriew na ki tyrsim ka jingma jong ka ‘eriong ‘erngit kaba la wan ban beh kyrthlep bad sdang ruh ban rah ban rong noh wat ia ki tynrai jingngeit jong ka Jaidbynriew.
Dei ruh ha kane ka sngi ba ka Jaidbynriew ka la sei ia ki rangkynsai ki rangdajied ban iada ia ka na ka jingtyllep u lyoh ba dum bad dei kine ki rangbah kiba pynkhie im bad pynkyndit bynriew ia u Khasi lyngba ka bor pyrkhat bad jingiohi jingai jong ki ban ialeh pyrshah ia ka jingthombor u nongwei nongar, ban pynduh pyndam ia ka jingngeit niam, ngeit rukom bad riti dustur Khasi.
Dei lyngba kane ka sngi ba ki ioh ia ka rongser ka ban pyni ha u shatei shathie, mihngi sepngi u ei u Khasi. Ka niam, ki riti dustur bad jingim Khasi ki long kiba kynsai haduh katta katta namar la pynshong nongrim ha ka tip briew ka tip Blei, Tip Kur Tip Kha bad ban kamai ia ka hok bad ba dei tang U Blei Trai Kynrad Nongbuh Nongthaw U ba lah ba iai.
Kumba ju long man la ka snem, ia kane ka jingrakhe la sdang shwa da ka jingkyntiew ia ka lama jong ka Seng da u Rgh B Rumnong President, Seng Khasi (Kmie) nangta la pynbud sa da ka nguh ka dem da u Rgh Hambok Kharmawphlang ia kaba la pynlong ha Ïing Seng- ha Mawkhar, ka pule Sneng Tymmen, jingrwai ba la ai da ki khynnah jong ka Seng Khynnah Seng Khasi bad kren ai khublei da u Rgh Arwan S Tariang – General Secretary.
Hadien kane ka jingrakhe sdang, la kiew pat sha madan Ïewrynghep- Laitumkhrah, ha kaba ka la don biang sa kawei ka jingialum u kur u kha bad la ioh ia ka ki kyntien pdiang burom na u Rgh Kworshon Marbaniang jong ka Seng Khasi Nongthymmai Madanriting Pyllun, ka nguh ka dem da u Rgh Donbokstar Kurkalang, bad ioh ruh ia ka jingshad mastieh kaba la ai da ka Seng Khasi Nongthymmai Madanriting Pyllun.
Hadien kane la plie pat ia ka Iaid Pyni Riti ia kaba la synran lang da ki para kur ki para kha ha ryngkat ka riam ka beit tynrai arted haduh ban da poi ha ïing seng ha Mawkhar bad bteng biang ia ka jingiaid paidbah shaduh ka lympung ha madan Weiking, Jaiaw.
Haba la poi hangne ka jingialang kaba hehbah ka la sdang biang da ka jingkren pdiang burom biang na u Rgh B Rumnong, President, bad la pynbud pat da ka nguh ka dem da ki Tymmen ki San Seng Khasi Kmie. Hadien kane, sa ioh pat ia ka jingrwai iaroh ia ka Seng Kut Snem ba la ai da ki khun samla ka Seng Khasi bad na ka liang u Rgh Arwan S Tariang uba long u General Secretary, ka Seng Khasi (Kmie), u sa pule ia ka kaiphot treikam jong u snem bad la pynbud pat ter ter da ki jingrwai bad ki jingkren kiba iadei bad kane ka phang jong ka Seng Kut Snem.
