Shillong, Naiwieng 03: Ka Betasi Tv bad ka seng CSWO mynta ka sngi kala pynlong ia ka jingthang mombati ha khyndailat ban pynpaw ia ka jingsngewlem sha kito kiba ha ha sem jong kiba la khlad noh na ka jingbat ka bor ding elektrik ha ka shnong Nongthymmai –neng ha Lyngiong ha kaba hynreiw tylli ki mynsiem briew kila duh eh na ka juh ka iing.
Ha kane ka sngi da ki bun spah ngut ki briew kila ia mih ban ia shim bynta ha kane ka jingiathang mombati ban pynpaw ia ka jingsngewsih haba ki don kum kine ki jingjia bad kane ka lah ban dei na ka jingbym salia jong ka MeECL ban peit ia ka kam kaba ka dei ban leh.
U Bah Thomas Passh President jong ka Youth Wing jong ka party KHNAM haba kren ha ki lad pathai khubor u la kynnoh ba beit beit ba kane ka jingjia ka dei na ka jingleh bym suid niew jong ka MeECL, ia kane kan nym lah ban kyntait. Kum ki paidbah kin nym lah shuh ban iai shah ia kane ka jingleh bym don jingkit khlieh jong ka MeECL.
Kum kine ki jingjia kam dei tang mynta hynrei la don ruh ka jingjia kaba dang shen ha Sohiong bad ha kiwei ruh ki jaka bad u la ong ba wat tang ia ki post eleltrik kiba la jan khyllem ruh ka MeECL ka ong ba kam lah ban bujli ia ki namar ba kam don pisa kane ka long kaba kim lah ban pdiang.
Na ka liang jong ka Betasi Tv bad ka seng CSWO ia kaei kaba mih na kane ka jingthang mombati ban oh syniang sngewlem da ki paidbah, ia kane ka jingmih kin leit ban ai jingiarap sha kito ki long iing kiba la ngat ha kane ka jingjia ba sngewsih ha Nongthymmai-Neng ha Lyniong.
