Shillong, Lber 23: Mynta ka sngi ki nonghikai Adhoc kila sdang da ka jingiakhih da kaba shong kyllain mungor ha khmat ophis jong ka MBOSE ban dawa na ka sorkar ba dei ban pynkiew noh ia ka tulop jong ki nonghikai ha ka jylla kaba la pynkiew khatduh ha u snem 2016.
U bah Mayborn Lyngdoh wei na ki nongialam jong ka kynhun ki nonghikai Federation of All School Teachers of Meghalaya (FASTOM) haba ia kren bad u SP News Agency la ong ba kila ia kren ia kane ka kam la bun sien bad ki ophisar hynrei kam shym poi haei haei ruh bad mynta ki kwah ban ia kren beit noh bad ka sorkar.
La Iathuh ba kila dep ban ai jingmut sha ka sorkar ba ka dei ban siew kyllum ka tuh ka jignsiew kaban long T.18000/- tyngka ia baroh ki nonghikai Adhoc ha ka jylla baroh kawei naduh ki nonghikai Lower Primary, Upper Primary, Secondary bad Higher Secondary School bad ia kane ka jingtyrwa la pdiang lang da baroh ki nonghikai.
Kaei kaba ki nonghikai ki ioh mynta ka long ia ki Lower Primary T.12000/-, Upper Primary T.16000/- , Secondary T.20000/- bad Higher Secondary School T.24000/-, na ka liang jong ki nonghikai skul Adhoc kila tyrwa sha ka sorkar ban siew noh ka juh ka tulop ia baroh bad ban pynkiew pat 5% man la u snem na ka tulop ba ki ioh.
Lah ban pynkynmaw ba na ka liang jong u mytnri ba dei peit ia ka tnad pule u bah Lahkmen Rymbui la ong ba lada ka sorkar ka pynkiew ia ka tulop jong ki nonghikai skul ka sorkar kan hap ban pynlut tam sa kumba T.251 klur tyngka ha ka shisnem.