Shillong, Jymmang 18: Ka KSU South West Khasi Hills District ha ryngkat bad Ka shnong Nonghyllam ki la ujor daka FIR pyrshah ia u C.R Marak Sub-Inspector, ia u Balbring G. Momin 3rd Battalion MLP, ia u Pynshangbun Shangpliang SF-10 Commando, ia u Mathiush Marak SF 10 Commando bad ia u Solomon R. Marak 3rd Battalion MLP halor Ka jingdonkti ban shoh pynmynsaw ia Ki lai ngut ki khynnah ba dang hapoh 16 snem kiba la tip kum u Phaskupar Nongtnger, u Manlyness Marngar bad ia u Manbha Hahshah kiba dei tang ki khynnah skul ba dang hapoh katta bad kane Ka la jia haka janmiet 17 tarik haka por 4 baje eiei ha Nonghyllam katba kine ki khynnah ki dang leit sum hajan Ka skul Jingaiti Secondary School, Nonghyllam.
Ym tang katta, kine ki pulit runar ki la pyrshang ruh ban rahbor ia uwei u khynnah rit ba dang hapoh iaka 6 snem karta da kaba pyrshang ban thep haka Kali ML05 G 7459. Na ka liang jongka KSU SWKHD mar sien ioh jingtip halor kane ka jingthombor ki la hiar wut sha Nonghyllam bad buh ruh daka FIR halor kane.
Na ka liang ka Seng KSU pynrem jur halor kane ka jingthombor daki briew jong ka ain bad haba kumne iano ki paitbah kin shaniah lada kim lah ban shaniah iaki briew jongka ain. Ka Seng ka dawa ba Ki bor ba hakhlieh ki dei ban pynshitom mardor ia kiba kum kine ki briew kiba shim kabu ia ka bynta Ba Ki bat namar haka jaka ba kin leit sha katei ka thain ban ai jingiada iaki paitbah ka thain ki kylla long pynban ki nongpynthud iaka shong suk shongshngain .
Ka Seng ka la ioh ruh ban iakynduh ia Ka DC South West Khasi Hills District Ka kong R.Lyngdoh halor kane ka bynta bad ngi la pynsngew ruh ba dei ban leh tyngeh ia kine ki pulit runar kiba la nud ban thombor pyrshah iaka hok jongki khynnah. Ka KSU ka dawa ruh ba dei ban lehtyngeh ia kine ki pulit khnangba kiba kum kine kin nym jia shuh nangne shakhmat. La ong u Bah Forwardman Nongrem President KSU SWKH District.
