Shillong, Jylliew 23:U Chief Executive Member jong ka KHADC, u Bah Ardent Miller Basaiamoit ula wanrah ia ka mang tyngka na bynta u snem 2014-15 kaba duna T.45, 890 na ka jingpynlut kaba la mang T.104.38 klur katba ka jingpynmih ka long T.104.37 klur.
Ha katei ka mang tyngka ba la wanrah da u CEM hynne ka sngi sdang ka Dorbar Mang tyngka jong ka KHADC ka jingmang pisa ban pynlut na bynta u snem 2014-25 ka long T.104,38,26,090 katba ka jingpynmih pisa ka long T.104,37,80,200 kaba pyni ba ka kham heh ka jingpynlut ban ia ka jingpynmih pisa.
Kane ka mang tyngka ka kynthup na bynta ban siew tulop ia ki dkhot ka Iing Dorbar, ki nongtrei jong ka council bad kiwei kiwei ki kam pynroi kiba ka KHADC ka dei ban leh na ka bynta ki paidbah.
Haba kren u Bah Ardent ula ong, ka Executive Committee kan ym shongthait ban wad ia ki lad ki lynti ban nangkyntiew ia ka ioh ka kot na bynta ban pyntyllun ia ka kam jong ka Council na kawei ka snem sha kawei pat.
U CEM ha ka jingkren ka jong u u la ong ba ka ka Executive Committee ka la shimkhia ia ka jingdonkam ban pynneh pynsah ia ki “Law Adong”, “Law Kyntang” kiba hab hapoh ka jingpeit jong ka Council, ha kaba ka EC ka la shim ia ka sien jam ba nyngkong ha ryngkat ka jingsngewthuh jingmut bad u Syiem, ki Myntri ban pynbna ia ka “Law Syiem” kaba don ha u Lum Mawpat kum ka “Law Adong”.(SP News)
