Shillong, Lber 11: U Chief Executive Member jong ka Khasi Hills Autonomous District Council (KHADC) mynta ka sngi la wan rah ia ka mang tyngka ba ka bynta u snem 2024-2025 ha ka jingduna kaba T.4,33.410/- tyngka.
Ka jingpynlut na ka bynta u snem 2024-2025 kan long T.329,07,00,710/- tyngka ia kaba ynsa pynlut ha kane ka snem mang tyngka katba ka jingmih baroh na baroh ki jingmih ka long T.329,02,67,300/- tyngka ha kaba ka jingduna pisa kala kot sha ka T.4,33,410 tyngka.
Haba kren ha ki lat pathai khubor ha dien bala kut ka jingiashong dorbar na ka liang jong u CEM la ong ba ka jingkiew ha ka mang tyngka mynta u snem ka long da T.50 klur tyngka, la ong ba ka jingmih kaba ka KHADC kn ioh ha u snem mang tyngka 2024-2025 kan long T.73,39,20,548/- tyngka.
U CEM u la kren shai ba ia ka tulop jong ki nongtrei bad ia ki EM bad ki MDC kan long beit tang ka jingmih jong ka KHADC, la ong ba ka EC ka hap ban adkar bha namar ka jignmih ka long T. 73,39,20,548/- tyngka katba ka jinglut ha ka shisnem ka long T. 60,00,00,000/- tyngka.
La iathuh ba ka jingsiew ia ka tulop ka bai bam tyngmen jong ki nongtrei ka KHADC ha ka shibnai ka long san klur tyngka bad ha ka shi snem ka jinglut kala kot sha ka hynriew phew klur tyngka, dei hangne ba ka KHADC ka hap ban tuklar bha.
