Nongpoh, Iaiong 25: Ka Holy Heart Orphan’s Home, kaba don ha Killing, Ri-Bhoi district, ka long kawei na ki jaka ri khunswet kaba la bna nam bha ha ki por mynshuwa, hynrei mynta katei ka jaka ri khunswet, bun ki briew ki la sdang artatien ia ka, wat ki seng bhalang bad ki tnat sorkar jylla ruh kiba dei peit ia ka bha ka miat jong ki khynnah rit ki la artatien ia ka rukom shakri katei ka jaka ri khunswet.
Mynta ka sngi, na ka liang ka Hynñiewtrep Achik National Movement (HANM), Women’s Wing (WW), ryngkat bad ka jingtreilang ka District Child Protection Officer (DCPO) jong ka Ri-Bhoi district, bad ka Child Welfare Committee (CWC) jong ka district, ki la hiar jurip ia katei ka jaka ri khunswet kaba don ha Killing kaba la pyniaid bad long trai da ka Kong Holy Kharjahrin.
Ha ka jingjurip, na ka liang ki ophisar ka tnat District Child Protection Office, ba la don ryngkat ka Kong E Kharpuri, DCPO, ba la synran lang da ka Kong R.S Dkhar, Protection Officer Institutional katei ka tnat, ka Kong B Basaiawmoit, kawei na ki dkhot ka CWC, bad ba la ialam da ka Kong Bety Jyrwa, president ka HANM WW bad ka Kong B Sungoh, general secretary, ki la lap ia kiba bun bah ki jingbym biang ka rukom ai jingshakri katei ka jaka ri khunswet.
Haba iakren bad ki nongthoh khubor hynne ka sngi, hadien ba la wan jurip na katei ka jaka ri khunswet, ka Kong Khapuri ka la ong ba katei ka jaka ri khunswet ka la iaid lait na ka jingbthah ka sorkar jylla ba man la ki jaka ri khunswet, ki dei ban rejistar bad ka Juvenile Justice Care and Protection Act, kaba katei ka jaka ri khunswet, watla na ka liang ka tnat DCPO ka la ai jingtip naduh u bnai Nailur jong u snem 2013, hynrei katei ka trai ba ri khunswet kam shym la patiaw satia ban ai jubab halor kane bad ban rejistar, namar katei ka Act ne ka Aiñ ka long ban iada ia ki khynnah katkum ka jingbthah ha ki kyndon jong katei ka Aiñ, la kynnoh ka Kong Kharpuri.
ka kong Kharjahrin kala ong ba ia ka bailut baisep jong ki ha ki jingeh ba ki shem shitom bad ka ju lut hi nadong shadong ia ki jingdonkam jong ki ha ka pule puthi bad kiwei kiwei ki jinglut kum ki jaiñ ka bam ka dih, khlem da ioh ia ki lad jingiarap na ka sorkar, watla ka la ioh ia ka jingsiew na ka sorkar ban shna ia ka ïing skul bad ka tulop nonghikai na ka SSA lyngba ka tnat pule puthi ha ka district.(SP News)
