Shillong, Lber 07: Ka JSU mynta ka sngi ka la weng noh ia ka lama iong ba la sieh ha Nongtalang CHC mynta la 9 bnai hadien ba la sdang biang ia ka 108 hapoh Amalrem Subdivision naduh ka 5tarik Lber 2022. Kum ban shu pynkynmaw ba ki khynnah samla ka Ri War Jaintia hapoh ka seng JSU ki la iai dawa na ka bor sorkar naduh u snem 2018.
Ka seng kala iai buddien ruh ha u snem 2020 ha kaba la ai dorkhas la ai ruh sha u A. L. Hek Myntri ka Health ha u snem 2020, ia u James Sangma myntri ka Health ha u snem 2021 bad ruh ia u Ram Kumar, Director ka NHM bad Dr. Aman War, Director ka DHS(MI) bad sha u MLA ka thaiñ.
Na ka liang u General Secretary ka JSU central Body u samla Treiborlang Suchen u la ong ba ka seng ka lah sdang ban dawa ban pynioh biang iaka kali kitnongpang kaba biang ka 108 kadei hadien baka seng ka ioh iaka jingujor na ki paitbba ka thaiñ ba ki shem jinjar ban poi shaka jaka sumar namar bym ioh iaka kali 108 hapoh ka Amlarem Sub division.
U nongialam ka seng u lah ong ruh dei hadien ba lah ioh jingtip ba iaka kali 108 kaba juh don mynshua hapoh ka thaiñ lah rah noh shawei bad u lah ong ruh dei na kane ka daw ba ka seng ka ieng skhem haka nongrim ban dawa ha ban da ioh pat ia ka kali 108 hapoh ka thaiñ namar kadei ka hok jong u paitbah ka thaiñ ban ioh jingmyntoi haba pang ba shitom.
Namar kane ka kali 108 Ambulance ka don iaki nongsumar bad ki tiar ki tar kiba biang ban sumar hapoh kali ban poi sha hospital.U samla Suchen u lah ong ruh ka jingioh pat ia kane ka kali ka dei ka jingdawa kaba jop bad kan ai jingmyntoi ia ki nongpang.
U samla Eddy Kery Pohtam, u President ka JSU War Jaintia Circle u la pynpaw ka jingsngewnguh ia baroh kiba don bynta ban pynpoi biang ia ka 108 service hapoh ka thain naduh ki doktar ka ChC bad ki PhC bad ruh ia ki Director ka tnad DHS u bad NHM bad kumjuh ruh ia u SDO barim ka Amalrem Civil Subdivision u Abhilash Baranwal.
Ka seng ka ai khublei ruh ia ki riew paidbah kiba long ki nongkyrhan ia ka seng ha ka ne ka jingdawa ka jong ka thain. U la ong ba ka long kaba sngewnguh shibun eh namar ba ka la long ka jingsuk ia kiba pang ba shitom bad ka ba sngewtynnad eh ka long ba ki riew paidbah lem bad ki nongtrei sorkar ki la kyrshan ia ka ne ka dak jingdawa ha kaba um shim la don ka jingweng ia kane ka dak jingdawa haduh mynta watla ka la don mynta la bun bnai.
U samla Kerrydiam Lamin, General Secretary ka JSU war Jaintia circle u la pynpaw ba ka long kaba donkam ia ka jingtip ki paidbah ka thain ban phone sha u 108 haba don ki emergency cases namar kane ka long ka jingiarap na ka sorkar khlem ka jingsiew bad ruh namar ba ka 108 kadei kata kaba don ia ka basic life support system hapoh ka kaba long iarap shibun ia ki ba pang ba shitom khamtam ha ki khem pan pynlait Im ia ka jingim. U la kyntu ia ki paidbah ban phone sha u 108 namar ba kawei na ka daw ba la weng noh ia ka 108 ha u snem 2014 kadei namar ba duna ki phone call ne ki cases ha ki to ki por.
