Shillong, Lber 13: Mynta ka sngi ka iing dorbar jong ka KHADC kala pdiang ia ka rai jong ka iing ban weng noh ia ka jingpynduh ia ka Nongpoh Town Committee kaba la pynmih ha ka 5th Lber 2024 bad ia kane ka kaiphot la pdiang da ka iing dorkar ha ka 11/Lber/ 2024 da u bah Pyniaid Chief Executive Member.
Mynta ka sngi ha dien bala kut ka por jingkyllai u bah Ronnie V Lyngdoh MDC na Mylliem u la wan rah ia ka “Point of Order” ha kaba u la buh ha khmat ka iing dorbar ba lada long ban shimnoh ia ka kaiphot kaba la wan rah da u CEM ha kaba ia dei bad ka Nongpoh Town Committee kaba la wanrah hapoh ka iing dorbar ha ka 11/3/2024.
Halor kane u nongialam ka liang pyrshah u bah Titosstarwell Chyne u la buh ka jingkylli halor kano ka rule bala wanrah ia kane ka jingkyntu ban shimnoh ia katei ka Kaiphot, u la ong ba ym pyrshah hynrei shukwah tang ban tip halor kano ka Rule jong ka AD Rule jong ka KHADC.
Halor kane na ka liang jong u Deputy CEM u bah Pynshngian N Syiem u la ong ba, ha ka jingshisha kam don kum katta ka rule hapoh ka AD Rule jong ka KHADC, hynrei da ka jingsngewkhia ia kane kam wat la ia ka kaiphot la wan rah hapoh ka iing dorbar la hapban shim ia ka rai jong ka iing dorbar.
U Bah Pyniaid Sing Syiem CEM jong ka KHADC u la ong ba ha ka 12/3/2024 u la ia kynduh iaki synjuk ki rangbah shnong ka Nongpoh Town Committee kaba kynthup ia ki 11 tylli ki shnong bad ha dien ba la ia kren sani bad ki kila pynpaw ia ka jingeh bad kumta na ka liang jong u MDC na Mylliem u la wanrah ia kane ka point of order.
Ha dien bala sngap ia ka jngpyninai na baroh ar liang u shongknor jong ka iing dorbar u bah Lamphrang Blah u la buh ia kane ka mat hakhmat jong ka iing dorbar la kan pdiang ne em, haba la buh ha khmat ka iing dorbar ka iing dorbar ka la pdiang.
Da kane ka jingpdiang ka iing dorbar la weng noh ia ka jingpynbna bala pynmih ia ka kaiphot ha ka 5/3/2024 bala pynduh noh ia ka Nongpoh Town Committee bad ia ka kaiphot kaba la wan rah ha poh ka iing dorbar la weng noh, da kane ka jingweng ka Nongpoh Town Committee kaba kynthup ia ki 11 tylli ki shnong kala im biang.
