Shillong, Rymphang 22: Ka Executive Committee jong u Bah PN Syiem hapoh jong ka KHADC mynta ka sngi kala lait na ka jingiatynjuh bor ha dien ba u bah HS Shylla u la weng noh ia ka No Confidence Motion kaba u la wanrah hapoh ka iing dorbar thawain ha dien ka jingiatai kaba la neh kumba saw kynta tam.
Na ka liang jong u CEM jong ka KHADC haba pynshai ia ki jingkynnoh jong ki MDC kiba la wanrah ia kane ka NC pyrshah ia ka EC hapoh ka iing dorbar jong ka KHADC, ka long kaba la thaw history ha kaba la wanrah da u dkhot jong ka iing dorbar u ba don lang ha ka liang shynshar kane ka long kaba ym juh kham jia koit.
Halor ka jingkynnoh ha kaba iadei bad ki jingkynnoh pyrshah ia ka EC, u CEM u la pynshai kaba ia ka MOU kaba la ia soi hapdeng ka UCIL bad ka KHADC ka iing dorbar kan sa pynduh noh bad ia ka NOC ba la ai sha ka UCIL ruh kan pynduh noh, halor ka KHFC, la ong ba ka shithi ka don ha ophis bad halor ka jingleit ban ia kynduh ia kynhun Dimas yn don ba lah ban khang ia u CEM.
Halor ka jingong ba balei ban don than eh ia ka jingiapyneh hapdeng ka KHADC bad ka sorkar, u Bah Pynshngiang u la ong “ Ngi la thait ban ia pynjem rngiew than ia ka Council, wat pynlong agency ia ka District Council”.
Haba ia kynduh ia ki jingeh kum ki nongialam hap ban mat ia ki jingeh bad ym dei ban kylla rong than bad haba hap ban ia khun pyrshah hap ban ia khun, ka EC kan sngap ia kaei kaba ki para lok MDC ki kren, ha lor ka khyndew ki paidbah ki long ki trai hato hap ban leit shim jingbit ban shna iing.
U Bah Pynshngian u la ong ha ka jingshisha la dei ban weng shuwa ia ka jingkyrshan bad sa wanrah ia ka NC, wat ialam bakla ia u paidbah kane kala pynjah burom ia ki nongmih khmat bad kane ka NC ka long shai ban pynkhyllem ia ka EC.
Ha ka jingkren jong u Bah HS Shylla haba wanrah ia kane ka NC mynta ka sngi u la kdew ia ka rukom thung kam ia u nongbishar hapoh jong ka iing bishar jong ka KHADC, kumno la thep ia ka pisa jong ka Professional Tax, u la kynthoh ruh ia ka KHFC ba kumno la ai ram sha ka KHFC. U la kren ruh halor ka PDF balei shah kawangmaw ka ophis jong ka KHADC, kiba la kyrshan ia u kane ka NC hapoh ka iing dorbar ki long u Bah D Wallang, Bah PT Sawkmie, Bah J Tynsong, bah L Blah, Bah P Syiem.
Katba na ka liang synshar kiba la pyrshah ia ka NC kiba la ia shim bynta ha ka jingiakren ki long u Bah Antonio War, Bah Ban Basaiawmoit, Bah Adelbert Nongrum. Ha dien ba la ia kren na baroh arliang u Chairman jong ka iing dorbar u Bah L G Nongsiej u la kylli na u Bah HS Shylla la yn weng ne em ia kane ka NC, na ka liang jong u Bah HS Shylla u la weng noh ia ka NC na ka iing dorbar.
