Shillong, Jylliew 06: Ka Sorkar Jylla ryngkat bad ki shipai suin jong ka Eastern Air Command ki la rai ban iatrei lang ryngkat ryngkat na ka bynta ban ialeh ban pynkloi bad pynsted ia ki lad ai jingiarap ha kano kano ka por jong ka jingwan lynshop na ki bor ka mariang, la ka long na u jumai, ka jingshlei um ne kiwei kiwei.
Kum shi bynta ban ialeh ban pynsngewthuh bad ai ia ki jingtip kiba kham bniah ka kynhun shipai suin jong ka Eastern Air Command mynta ka sngi kala plie ia ka jingai jinghikai kaba lai sngi lynter bad ia kane ka jinghikai la tip kum ka ‘Nabhas Rahat’ ia kaba la pynlong ha Upper Shillong.
Ia kane ka jingai jinghikai la plied a u myntri rangbah ka jylla u Dr Mukul Sangma ha kaba la don lang ruh u Air Marshal Anil Khosla AVSM VM AOC-in-C, u heh duh jong ka EAC, ki heh jong ka NDMA bad kiwei kiba la iashim bynta ha kane ka seminar ki kynthup ia ki heh ophisar ka Jylla, na ki tnad shipai, duriaw, CRPF, BSF, NCC, NSS, IDS, ki pulit jong ka jylla bad na ki tnad sorkar jylla, Deputy Commissioner Shillong, Meghalaya State Disaster Management, National Disaster Management Authority, National Disaster Relief Force bad kiwei kiwei.
Ka jingthmu ba hakhmat jong kane ka seminar ka long ban don ia ka jingiatrei lang bad khamtam ban don ia ka jingiasngewthuh jingmut hapdeng ki bor sorkar bad ki bor shipai kumno ban iaid bad ai ia ki lad jingiarap ha kano kano ka por ba wan ka jinglynshop jong ka bor mei mariang bad khamtam lei ia ka jingiarap ban ai na suiñ.
Haba iakren bad ki nongthoh khubor, u Dr Mukul u la ong ba ka long kaba donkam ban don ia ka jingiatrei lang hapdeng ki bor sorkar bad ki bor shipai kumno ban ialeh ban pynduna bad weng ia ki jingeh ha ka por jong ka jinglynshop ka bor mariang namar ym lah ban tip ha kano ka por kan wan, la ka long u jumai, ka jingshlei um, ka jingtwa khyndew ne kiwei kiwei, kiba wanrah ym tang ka jingduh ia ki jingdon jingem hynrei ba shim ruh wat ia ki jingim briew.
Kum shi bynta ban pynsngewthuh shuh shuh ia ka rukom ai jingiarap ha ka por jong ka jingwan jong ka jinglynshop, na ka liang jong ki shipai liengsuin lashai ka sngi, kin sa pynlong da ka drill ban pyni kumno ba dei ban leh ha ka por jong ka jingai jingiarap bad ha kano ka dur ban pynsted bad pynkloi khnang ba yn lah ym tang ban iada na ka jingjur ka jingjulor hynrei ruh wat ban iada ia ki mynsiem briew.
