Shillong, Jylliew 22: Ia ka Iewduh la sdang ban plie mynta ka sngi ha dien ba la khang lai bnai lynter na ka daw jong kane ka khlam COVID-19. Ka Hima Mylliem nalor ki kyndon kiba la buh da ka sorkar, kala pynmih ruh ia ka hukum ba dei ban sait kti bad deng mask shuwa ban rung hapoh Iewduh.
Ka Hima kala buh ia ki jaka sait kti ha baroh ki jaka ban rung sha Iewduh bad kila don ki pulit jong ka hima ban ap bad bthah ia ki paidbah ba rung sha iew ba kin sait ia ki kti jong ki bad ba ki dei ban deng ia ka mask.
Na ka liang jong ki nongshong Iew kila pynpaw ia ka jingsngew kmen ka jong ki ba ki la ioh ban plie ia ki dukan jong ki kiba la shukhang mynta la lai bnai, kiba shong dukan kila iathuh ba kila don ki jingduh ki mar ki mata hapoh dukan namar bala shu khang khyrep.
Kila pynsngew ba wat la ka jingplie ka long katkum ki dak kiba la buh ha ki dukan jong ki A, B bad C bad katkum kane ka jingbuh dak ki ioh ka lat ban plie ar sien ha ka shitaiew kane kala dei ka jingkyrkhu namar ba kila shu shong iing mynta la lai bnai.
Haba ia dei bad ki kyndon kiba la buh da ka sorkar, kila pynsngew ba kila sngewthuh ban don ka jingiajngai bad ki hap ban buh haki dukan jong ki ia ki jingsait kti bad nalor katta ka long ba ki hap ban leh khuid ia ka iew bad ka hima kala bthah ba lada lap ba ki pynkhein ia ki kyndon ki dukan kin shah khang.
