Shillong, Iaiong 19: U Myntri rangbah ka jylla u Conrad K Sangma mynta ka sngi la pyntip lyngba ka twitter ba ka sorkar pdeng kala ai ia ka jingmynjur ban ai pisa T.43.70 klur ban shna pynbha ia ka surok Dawki sha Amlarem na ka bynta 14.900 km kaba dei jong ka surok bah NH-40E bad mynta kala kylla NH-206.
Ia kane ka shithi ba ka sorkar pdeng kala mang pisa la phah sha u Secretary jong ka tnad PWD jong ka sorkar Meghalaya, ka sorkar jylla kala pan ia kane ka pisa na ka sorkar pdeng ha u snem 2021 ban pynbha ia kane ka surok bad ka jingpan ka long T.50 klur bad ka sorkar pdeng kala mynjur ban ai T.43.70 klur.
Ha ka juh ka por ka sorkar pdeng lyngba u Kamal Prakash ba dei Udner Secretary ka sorkar pdeng kala bthah shai kdar ba kane ka pisa la mang halor ka nongrim ba ia ka jingtrei dei ban pyndep ha ka por kaba biang katkum ki kyndon kiba la buh.
