Shillong, Jymmang 07: Ka KSU Jaiñtia Hills District Unit ka pynpaw ia ka jinglyngngoh jong ka halor ka jingsngap jar ka ophis u Deputy Commissioner , jong ka East Jiantia Hills District, Khliehriat ba kim shym leh eiei halor ka jingma ba ap ia ka jingkieng Rimanar,Samasi.
Kum ban pynkynmaw , ka seng ka la buh jingthoh ha DC ophis (17/04/2018) ha u Bah SS Syiemlieh ADC kum ka jingpyntip ba ka jingkieng Rimanar ka la pynpaw ia ki dak jingorpait ba ka lah ban wanrah jingmynsaw ia ki briew ha kano kano ka por bad ka ban pynthut ia ka leit ka wan jong ki briew ba shaniah lyngba kane kajingkieng.
Halor kane ka bynta , la ioh jingtip ruh ba la dep pynjari ia ka kyndon CrPC 144 bad khang ruh ba yn ym shah ia ki kali heh khamtam ki trok ba kin ym kit Palat ia ka 9 ton lyngba ka jingkieng Rimanar kat kum ka hukum.
Haka jingiakren u Bah SS Syiemlieh u la kular ban kitkhia ia kane ka kam bad ban pyntip ia u rangbah shnong Samasi ban jurip ia kane ka kam ryngkat bad ka KSU ruh hynrei kaba sngewsih ka long ba haduh mynta kam don kano kano ka jing pyntip ne ka kam ba leh da ka ophis u DC halor kane.
“Ngi khmih lynti ba ka ophis sorkar kin shimkhia ia ki jingeh ki paidbah hynrei pleng kam shym la jia kumta wat haba ka por ka la leit. I kumba ki Nongtrei ki ia shah bad ki Trai kali ba kit Palat pud”, la ong I samla Albinus Lamurong, Asst General Secretary KSU JHDU.
Ka seng ka la kynnoh ba lah ban don kaei re kaei sha lyndet ba ka ophis DC kim trei ban ai hukum ne phah briew ban jurip bad khanglad ia ki kali ba kin kit Palat pud lyngba katei ka jingkieng.
Ka KSU ka kyrpad ruh ia ki nongmih khmat jong ka thain u Mla bad ki MDC ban shim khia ha kaba iadei bad kane ka mat naka bynta ki pait nongshong shnong jong ka tain sumer shwa ban jia ei ei naka bynta kane ka jingkieng kaba long ka budlum jong ki pait bah sumer elaka.
