Shillong, Kyllalyngkot 05: Mynta ka sngi u Dr Celestine Lyngdoh u la shimti ia ka kam president jong ka Meghalaya Pradesh Congress Committee ha ka jingialang kaba la long ha Congress Bhavan Shillong da ka jingiakhublei bad u Dr DD Lapang ha ka jingiadon lang ki nongialam jong ka MPCC.
Ha ka jingkren jong u Dr Celestine kum u president jong ka MPCC u la ong ba ki nongialam hapoh jong ka seng ki lah ban kylla, ki dur khmat ki lah ban kylla, hynrei ka nongrim ba ka seng Congress ka ieng kan nym lah ban kylla hapoh jong ka seng Congress.
Na ka liang jong u Dr Celestine u la ong ba kane ka election kaba mynta ka long ka election kaba khampher namar ka dei ka election ha ka pyrkhat pyrdain. U la ong ba to ngin ia trei lang ha kine ki taiew kiba dang sah namar ka long kaba don kam haduh katta katta na ka bynta ka party.
U la kyntu ia baroh ki nongtrei parti ba kin peit ia u kyrtong u ba biang na ka bynta ka jaka kaba biang khang ba ka party kan wan sha ka jingjop. Haba kren halor ka jingmih noh ki MLA jong ka party u la ong ba ki paralok kila mih, hynrei ki paralok kiba kham bha kila wan sha ka parti.
U Dr Celestine u la kam ba ka sorkar ka ban wan kan dei hi ka sorkar congress, u la kyntu ia ki dkhot jong ka seng ba kin ia treilang ryngkat ryngkat ban wanrah ia ka jingjop na ka bynta ka party Congress ha kane ka MLA Election ka ban long noh shen.
