Thoh u Bah John sha u Conrad, u Bah HS Shylla ban khot dorbar kyrpang halor ka CAB,2016

Shillong, Kyllalyngkot 08: U bah John Kharshiing Sharman jong ka Federation Khasi State mynta ka sngi u la thoh da ka shithi sha u myntri rangbah ka jylla u Cornad K Sangma bad sha u CEM jong ka KHADC u Bah HS Shylla ban kyntu ia ki ba kin khot ia ka dorbar kyrpang ban ia kren halor ka Citizenship (Amendment) Bill, 2016 katkum ka Instrument of Accession bad Annexed Agreement 17 Aug 1948.

Ha ka shithi kaba la phah sha u myntri rangbah ka jylla u Bah John u la ong, kumban shu pynkynmaw Ka Dorbar Federation of Khasi States, ki la dep phah teng ia ka dorkhas sha u Prime Minister Ri India ha  ka 4 tarik August 2018 ha kaba la pynpaw ia ka jingsngewkhia halor ka jingmih ki kyrteng nongwei da ki phew lak ha ka jinglum kyrteng lyngba ka Draft National Record of Citizens (NRC) hapoh jylla Assam kaba la pynlong lyngba ki hukum jong ka Iing Bishar Supreme Court, Ri India, bad ha kaba la kyntu ia ka Sorkar India lyngba katei ka dorkhast ban pyntreikam ia ki juh ki nongrim Assam Accord, hapoh jylla Meghalaya namar ba kane ka Jylla Meghalaya ka dei kaba long teng shi bynta jong ka jylla Assam.

Hynrei kaba pynkyndit bad kaba long kumba niew bein ia ka jingsngew jong ki jaidbynriew rit paid kum ki Khasi, Jaintia, bad Garo, hapoh North East kbad namar ka tei ka jingtyrwa ban pynbeit thymmai ia ki kyndon long Nongshong Shnong, lyngba ka Citizenship Amendment Bill 2016, ka long kaba ia tyngkhuh bad ki dulir jingiateh bad ki jingkular (Instrument of Accession bad Annexed Agreement 17 Aug 1948,  kiba ka Sorkar India ki la dep soi bad mynjur bad ki Hima Khasi States hapoh ka rynsan jong ka Federation of Khasi States, bad ka long ruh kaba pyrshah ia ki kyndon Assam Accord – Memorandum of Settlement 15  August 1985

Baroh ma ngi ki jaidbynriew rit paid ki Khasi, Jaintia bad Garo ngi don la ka jong ka Riti Dustur ban long nongshnong ha man ki Shnong, Raid bad Hima,  ia kaba kita ki Riti Dustur kim pat don jingithuh hapoh ka Constitution Ri India haduh kine ki sngi.  Kumta ka Dorbar Federation of Khasi States ka dawa ba Ka Sorkar India ka dei ban pynlait (exempt) ia ka jylla Meghalaya na katei ka Citizenship Bill kum shibynta ban ban iada ia ka hok jong ki Khasi States.

Ha ka shithi kaba la thoh sha u CEM jong ka KHADC la kyntu ia ki bor KHADC ban thaw ki lad ban lum ia ka emergent special session jong ka District Council la kumno kumno ban wanrah ia ki rai District Council, ban kyntu ia ka Sorkar Jylla ban wanrah da ka rai resolution hapoh Assembly, ban pyrshah ia katei ka Citizenship Amendment Bill 2016.

Ban kyntu ia ka Sorkar Jylla ban dawa na ka Sorkar India ban pynpaw pynrung ia ka dulir Instrument of Accession bad Annexed Agreement 17 August 1948, hapoh Article 370 kum shibynta ba kan long ka kyndon iada ia ki Khasi, Jaintia bad Garo hapoh Constitution Ri India bad khnang ba kan long ruh kum ka jingiada bad ka jingpyntreikam ia ki jingiateh ki jingkular (IOA & AA).

Ban kyntu ia u President ka Ri India ba un bthah  ia ka tnad Union Ministry of Home Affairs ba kin pyntreikam ia ki jingbthah jong ka National Commission for Scheduled Tribes (NCST) bad ki kyndon jingiateh bad ki jingkular IOA & AA, kiba la soi bad mynjur da ka Sokar India ha ka 17 tarik August 1948.

Kumta ki khmih lynti ia ki jingshim khia jong phi ban pdiang ia kitei ki jingai jingmut kiban long ki lad jingiada ia ka jaidbynriew Khasi Jaintia bad Garo kaba rit paid ba kin lah ban ioh ban pynsngew sha ka Sorkar jylla bad Sorkar India lyngba ka rai District Council session. La ong u Bah John kharshiing ha ka kytwoh kaba la phah mynta ka sngi.

What Next?

Recent Articles

Leave a Reply

Submit Comment

*