Jowai, Naitung 17: U Prsident ka Khasi Jaintia National Union (KJNU), u bah Niman N Shadap, ha ka kyrwoh ba la pyllait hynne ka sngi u la ong ba ym shym la mut satia ban pynduh pyndam ia ki Pnar Alphabet lane ia ki dak thoh Pnar, hynrei ka jingmut ha ka khubor bala mih haka 15.07.2016, ka dei ban sangeh shwa ban thaw Committee namar mynta dang bun ki kynrum kynram. Hynrei ka jingthmu ban ai ka jingkyrshan ba radbah ban pynneh pynsah ia ka ktien ka thylliej ka riti ka dustur naduh u Khyriem, Pnar, Bhoi, War, Langam, Maram bad Diko.
Te ia mynta une u nongialam u kyrpat ia baroh kiba don hapoh ka Bri u hynnietrep Khasi Jaintia kumno ban ia pyrkhat shwa ban pynrung ia ki dak thoh Khasi ha ka Eight Schedule, kaba la don lypa ka jingpan la slem bad sa kawei ruh kaba ngi dang ia pyndonlang mynta ha baroh ki liang.
Une u nongialam ka KJNU u kloi ban panmap na kiba bun balang jong ka thain Pnar ha ka jingiadei bad ka jingbakla jong u kumba paw namar ha ka jinglong baroh uba bakla suda, te u la jingkyrpad ia baroh kin sngewbha ban map ia ka jingbakla, ba nangne shakhmat ngi ki khun ka Bri u hynniewtrep naduh u Khyriem, Pnar, Bhoi, War, Langam, Maram bad Diko baroh dei ban iatreilang lada ha kino kino ki kam, ban pynsah ia ka Ktien ka Thylliej, ka Dustur ka Riti khmatam eh ban iada ia ka jaitbynriew rit paid ka jong ngi.
U la ong ruh ba ngi don kam ia ka Ktien Pnar namar ba baroh don la ka jong ka dak thoh kumta u kyrpad ruh ia ka JHADC ban khot lang ruh iaki riewshemphang bad proh jabieng kumno ban pynwan dur shwa ia ka ktien Pnar namar ha kane ka thain Pnar jong ki la don bun ki jait ktien kiba la ia kren, khnang ba kin nym mih ki jingeh hadien ha bud bad ban lait ruh na ka jingiakawang para jait bynriew, la ong ba dei ban ia snoh kti lang naka bynta ban pynwan dur ia ki dak thoh, namar ba ym dei tang ka District Council ban ai ka jingmynjur hynrei dei ruh ban iakren bad ki bor ba halor khnang ba kan long shisha ka jingkyrkhu hadien habud bad ka pyrthei ruh kan tip ia ka jinglong kyrpang.
Te sa shisien u nongialam ka KJNU u khot lang ia baroh ban ai ka jingkyrshan ba pura shwa ia ki Dak thoh Khasi hadien kata pat ngin sa iawan rah lang iaki dak thoh Pnar bad kiwei ban pynrung hapoh ka Eight Schedule, im slem ka Ktien Khasi Pnar ba iar jong ngi, pynkut ka kyrwoh. kane ka long katkum ka kyrwoh ba la phah da ka seng KNJU.
