Shillong, Rymphang 17: Ka jingjia shah thombor ki paid Khasi ha ka thain Langpih ki long kiba khah khah khlem da khein shuh ia ka hok longbriew manbriew bad ia ka hok ka jong ki kum ki trai bad ki kynrad ha la ka jong ka khyndew ka shyiap.
Ka jingjia ha ka 14 tarik u Rymphang 2019 ha Umwali ha kaba ar ngut ki rangbah Khasi ki la shah kem bad palat 20 ngut ki la mynsaw kiba kynthup lang ia ki khyllung khynnah bad ki kynthei ka pyni ia ka jingkhein poh bad jingbym khein snep ki pulit Assam lem bad kiwei ki jaidbriew kiba don don ha kato ka jaka ia ki trai ri trai muluk kata ki Khasi.
Tang namar ba ka tnad bor ding jong ka Meghalaya ka thmu ban ai bor ding ia paid nongshong Khasi katei ka thain kaba long ka hok ba ha khmat ka jong ki, ki pulit Assam lyngba ki jingkynshoit ki kiwei ki jaidbynriew ki la bom la tied ia ki nongtrei ka MeECL bad ia ki paidbah ka shnong Umwali haduh ban da poi sha hospital.
Na ka liang ka seng mar synbna ia katei ka jingjia ha katei hi ka sngi lyngba ka KSU West Khasi Hills District Unit bad ka KSU Ri Muliang Circle ki la hiar bran bran sha katei ka shnong ban pynshngain ia ki nongshong shnong Khasi bad ban jurip ia kaei kaba la jia naduh ba sdang haduh ba kut.
Shuh shuh ka KSU sengkmie hapoh ka jingialam u samla Rapborlang Nongrum ki la hiar pat ha ka sngi kaba bud kata ka 15 tarik u Rymphang 2019 sha Nongstoin ban leit jngoh bad ai jingtngen ia kito kiba mynsaw ha katei ka jingjia.
Kane ka jingleh donbor ki pulit Assam bad kiwei ki jaidbynriew ka pyni shai ba ka sorkar Meghalaya kam lah ban ai ka jingiada kaba biang bad pura ia ki paid Khasi katei ka thain. Ka Khasi Students’ Union (KSU) halor kane ka phang ka dawa na ka sorkar ban buh bad pyn pahara kham bun shuh shuh ki pulit ha katei ka thain kynthup ia ki pulit SF- 10 bad SWAT khnang ban lah ai jingiada ia ki paidbah katei ka thain na kiwei ki jaidbynriew bad na ki pulit Assam.
Ha ka juh ka por ka KSU ka dawa ruh ba baroh ar tylli ki sorkar ki dei ban ai jingiarap ia kito ki lanot kiba la shah thombor bad dang don hapdeng ka jingsumar.
Khatduh khatwai ka seng ka maham tyngeh ba kim dei mushlia bad leh donbor ha baroh ki shnong Khasi lym kumta ka seng kan shim da ki sienjam kiba tyngeh. Ka jingbymkhein snep bad bym burom shuh wat ia u nongmihkhmat ka Rambrai Jyrngam Constituency, u Bah Kimfa Marbaniang ka pyni shai ba ki thmu ban klun lut ia ki jaka jong ki Khasi.
La iohi ruh ba kine kiwei ki jaidbynriew ki la tuklar ruh hapdeng haba u Bah Kimfa u dang ia kren bad ki pulit Assam kaba pyni ba kim khein snep ia ka jylla Meghalaya. Ka seng ka ai ka jingiaroh ia une u rangbah nongmihkhmat uba la leit bran bran ban iatai bad aireng ia kine ki nongkyntur pud.
