Shillong, Rymphang 28: Ka Esamin jong ki khynnah pule ba dei ia ka SSLC bad HSSLC ka ban pynlong da ka Meghalaya Board of School Education (MBOSE) kan sdang ha u 2 tarik Lber ia ki ba dei hapoh jong ka HSSLC bad ba ka bynta ka SSLC kan sdang ha ka 4 tarik u Lber.
Haba kren ha ki lat pathai khubor u bah M Marbaniang joint Director jong ka MBOSE, u la iathuh ba baroh ki khynnah kiban ia khun ia ka eksam matrik lane kata ka SSLC ha ka ban sdang ha ka 4th Lber ki don haduh 51356 ngut ha ki 143 tylli ki jaka thoh examin.
Ki jaka thoh eksammin ha Shillong Rehion ki don 83 tylli bad ha Tura Region ki don 60 tylli, ki samla pule kiban ia khun ia ka eksam, ki kynthei ki don 28412 ngut bad ki shynrang ki long 22922 ngut. Kine ki kynthup ia ki ba ialeh na ki skul bad kum juh ia kiba ia leh shimet.
Haba ia dei bad ka HSSLC pat kaba kyntup ia ka Arts, Science bad Commerce, baroh ki ban ia khun ia ka eksam ki long 30697 ngut ha kitei ki lai bynta ki jingpule. Kiba dei na ka Arts ki don 24867 ngut, Science ki don 3615 ngut bad ha ka Commerce ki don 2203 ngut.
Ki jaka thoh eksam kiba hap hapoh jong ka Shillong region ki don 64 tylli katba kiba dei hapoh jong ka Tura Region ki don 39 tylli baroh ki jaka thoh eksamin ki long 103 tylli. U bah Marbaniang u la ong ba na ka liang jong ka MBOSE kala pynkhreh ban peit ba ka eksamin kan long kaba iaid beit iaid ryntih.
