Tura, Niaitung 10: U bah K P Pangniang president jong ka party HSPDP u leit sha Tura ban ia kynduh ia ka Pressident jong ka party GNC ka Kalpana D Sangma ha ka jingiadon lang ki nongialam ka party.
Ha kane ka jingiakynduh kaba la long ha Tura ha ka sngi Thohdieng ha dien ka jingiaphylliew jingmut la shim ia ka rai ban ia bteng biang ia ka jingtreilang ha pdeng kine ki ar tylli ki party ban dawa ia ka jylla la ka jong, na ka bynta ki khasi ka Khasi-Jaintia State bad ia ka Garoland.
Ha kane ka jingiakynduh kila rai ban thaw ia ka Coordination Committee hapdeng kine ki ar tylli ki party ba kin ia treilang ha kane ka jingiaid lynti ban dawa ia la ka jong ka jong ka jylla bad kin phah ia ka dorkhas sha u myntri rangbah duh jong ka Ri India halor kane ka jingdawa.
Ha kane ka jingialang la pynkynmaw ba u nongialam ka party HSPDP u bah Hopingstone Lyngdoh bad u Cliford R. Marak kiba la bam kwai ha dwar u blei kila ia treilang bad kila phah lang ruh ia ka dorkhas halor kane ka jingdawa, kane ka jingiakynduh ka long ban pynimbiang ia kane ka jingiatreilang.
Ha kane ka jingiakynduh ia u president jong ka party HSPDP la synranlang da u Joint Secretary ka party u bah P. Ryntathiang bad na ka liang jong ka GNC la don lang u Deputy CEM jong ka GHADC u Nikman Ch Marak bad kiwei ki nongialam ka seng.
