Nongpoh, Iaiong 11: Ka Confederation of Ri Bhoi People (CoRP) Central
Zone ha ryngkat bad ka Nongpoh Circle mynta ka sngi ka la shim ia ka
sienjam babha jong ka ha kaban ai ia ka jingshakri kaba janai na ka
bynta ka imlang ka sahlang, ha kaba mynta ka sngi kane ka seng ka la
leit ban sam da ki mosari sha ki nongpang kiba shong basah ha ka
Shantivan ha Nongpoh.
Kane ka sienjam jong ka CoRP ka long ruh shibynta ban
ialeh kmen lang bad ki briew kiba don ia ka jingpang nianglyngkut kiba
la shah kyntait noh na la ki baieid bathoin jong ki bad kiba shong
basah pat ha ka Leprosy Colony, Shantivan, da kane ka sienjam jong
kane ka seng la sakhi ruh ba ki nongpang kiba sah hapoh ka Shantivan
ki dap da ka jingkmen kaba khraw ban tip ba dang don pat kiba dang
ieid bad phikir lem ia ki.
Ha kane ka sngi na ka liang ka CORP la sakhi ia ka
jingiadonlang ruh da u Working president Bah Bandari Ryntathiang, Bah
Wanbok Suphai, president ka central zone, Samla Kyrshan Uriah,
Secretary ka Nongpoh Circle lem bad kiwei kiwei ki nongkitkam ka CoRP
ha kaba ia kitei ki mosari la aiti noh ha ka sister Stanley MC.
Haba kren ha kane ka sngi, u Samla Wanbok Suphai kum u
nongialam ka seng nyngkong eh u la pynpaw ia ka jingsngewkmen kaba
khraw halor kane ka sienjam jong ka seng ha kaba da ka jingiasngewthuh
jingmut ki la shim ia kawei ka sienjam kaba bha ban ai ia ka
jingshakri kaba janai tam sha ki paidbah khamtam eh kum kitei ki
nongpang kiba la shah kyntait na ka imlang ka sahlang bad na ki baieid
bathoin jong ki.
Kum u nongialam, u la iaroh ruh ia ka jinglen lade da ki
sistar kiba dei ki nongpeit nongkhmieh ha katei ka Shantivan kiba
khlem da don kano kano ka jingkhohnioh mynsiem ki ri ki sumar bad ki
ai ia ka jingieid bad jingkmen ia ki nongpang na kylleng ka Ri ha kaba
ki nongpang kim ju don kata ka jingsngew jngai na la ing ne long
nongwei ha katei ka jaka sumar.
U la ong ruh, ba ki nongkitkam jong seng kin nangkner kti
ban iarap ia u paidbah lyngba kiwei kiwei ki kam babha sha ki paidbah
ka thain Ri-Bhoi, ka jingnoh synniang ka seng da ki mosari sha ki
nongpang ha katei ka jaka sumar ka dei halor ka nongrim ba kane ka
district ka dei kawei na ki district kaba kynrei bha ia ka jingpang
khiehshohrieh (malaria) kumta ki paidbah ki donkam eh ia kine ki
mosari ban iada na ki kaiñ pyrjong.(SP News)
