Shillong, Nailar 29: U myntri ba dei peit ia ka tnad shna surok jong ka sorkar jylla u Martin M Danggo u la ia shim bynta ha ka jingrakhe ia ka ‘A New India Manthan: Sankalp Siddhi’ kaba la long ha Mawkyrwat ia kaba la pynlong da ka tnad rep jong ka sorkar jylla lyngba ka Agriculture Technology Management Agency (ATMA), ha kaba la don lang ruh u project Director.
Kane ka jingrakhe ka long kawei na ki jingleh burom ban kynmaw burom ia ka jingdap 75 snem jong ka “Quit India Movement” kiba la ia khun tyngeh ban pynioh ia ka jinglait luit jong ka Ri bad ha ka juh ka por ka long ban pynkiew ia ka rep ka riang ar shah katban da poi u snem 2022.
Ha ka jingkren jong u Martin M Danggo ha kane ka sngi u la ai ka jingiaroh ia ka tnad rep ba kala lah ban pynlong ia kum kine ki jingialang ban hikai ia ki nongrep kiba dei kiba duk na kiba duk tam ha ka imlang sah lang ha kane ka jylla. Kum kane ka jinghikai kan iarap ia ki nongrep ban ioh ia ki buid kiba thymmai ha ka rukom rep.
Kiba la ia don lang ha kane ka sngi ki long ka kong Ripnar Lyngdoh Deputy Commissioner, South West Khasi Hills District, Bah K.Pyngrope,District Agriculture Officer, kong K. Swer, Project Director ATMA, Bah S.Rani, Assistant Director jong ka Horticulture bad u bah G. Nongrang, Sub Divisional Agriculture Officer.
