Shillong, Nailar 24: Mynta ka sngi ka kynhun Regional Democratic Alliance kaba kyntup ia ka UDP bad ka HSPDP ki party kiba ia don lang ha kane ka sorkar khleh khawlang ka Meghalaya Democratic Alliance kaba la ialam da u Conrad K Sangma jong ka NPP kila ia kynduh ia u myntri rangbah ka jylla ban ia kren halor ki lai tylli ki phang.
U bah Bindo M Lanong Senior Vice President jong ka party UDP haba kren ha ki lat pathai khubor ha dien ka jingiakynduh ia u myntri rangbah u la ong ba, ha kane ka jingiakynduh ia u myntri rangbah ka jylla u Conrad K Sangma ki long ha lor ki lai tylli kip hang, ka Lynti Rel, Kam pynbeit pud bad ka Assam bad ban pynrung ia ka ktien Khasi bad Garo ha ka Eight Schedule.
Haba ia dei bad ka Lynti rel na ka liang jong ka RDA kala kren shai ba ka sorkar ka dei ban iaid suki namar hap ban sngap ruh ia ka sur jong u paidbah, hynrei ha kaba ia dei bad ka lynti rel ban kit mar kit mata ka sorkar kan peit bniah lada ka long ne em ban long noh tang ha Khanapara lane Byrnihat.
Lada don ka lynti rel ban kit tang ia ki mar ki mata ha Khanapara lane Byrnihat kan iarap ha kaba pynhiar dor ia ka bai kit bad haba hiar dor la sngewthuh kan don ka jingduna ha kid or ki mur bad haba kiew ka bai kit kan don ruh ka jingkiewdor, dei na kane ka daw ba ki sa ai jingmut ban peit bniah ia kane ka bynta haba ia dei bad ka lynti rel ban kit mar kit mata tang ha Khanapara lane Byrnihat.
Haba ia dei bad ka jingangnud ban pynrung ia ka ktien Khasi bad Garo sha ka Eight Schedule jong ka Riti Synshar jong ka Ri India, ha kane ka jingiakren na ka liang jong u myntri rangbah u la pynsngew ba ka sorkar kala shim khia ia kane bad na ka liang jong u ruh kum u myntri rangbah ka jylla um sa bud dien bad shim khia.
Haba ia dei bad ka kam pud kam sam bad ka jylla Assam ka RDA kala kyntu ia u myntri rangbah ka jylla ba ka dei ban don noh ia ka jingiakren ha pdeng kine kin ear tylli ki jylla ban wad ia ka lat la kynti kumno ban ia pynbeit ia kane ka jingia kajia pud hapdeng kine ki jylla da ka jingiasngewthuh bad ia burom mar kylliang.
U bah Bindo M Lanong u la ba ha u snem 1987 kala don ka committee kaba la khlieh da u Justice Y.V. Chandrachud bad na ka liang jong u justice u la kdew ha kane ka kaiphot ba ka jylla Meghalaya ka kwah katkum ki hima khasi bad kat ka jylla Assam ka kwah ban pynbeit katkum ka riti synshar jong ka North East Re-organisation Act 1971.
