Shillong, Iaiong 06: Ka Voice of the people ka ba dei ka party ba dang shu mih ha ha shuwa kane ka election MLA 2023. mynta ka sngi ka la leit ban aiti ïa ka dorkhas sha u Myntri Rangbah ka jylla halor ban dawa ban pynlong ïa ka dorbar ba kyrpang na ka bynta ban ïoh ïatai bniah ïa ka Reservation Policy bad ka Roster System.
Haba kren sha ki lad pathai khubor u General Secretary ka party u Dr Ricky AJ Syngkon u la ïathuh ba kum ka party ka kwah ba ki nongthaw aiñ kin ïoh ban ïatai sani ha kaba ïadei bad kane ka mat khnang ban lah ban shim ïa ki sienjam ba dei biang ha kaba ïadei bad kine ki ar tylli ki mat.
U la ong ruh ba kane ka jingdawa ka party VPP ka long hadien ba ka Meghalaya High Court ka la bynshet beit ha ka sorkar bad ka ïing dorbar ban shim ïa ka rai na bynta ka jingpyntreikam ïa ka Roster System ha ka reservation policy u la ong ba ka long kaba donkam ba ka sorkar ban khot da ka dorbar kyrpang halor kane ka mat.
U la ïathuh ba kane ka sienjam kaba ka shim ban dawa dorbar kyrpang ka dei tang ka sienjam kaba nyngkong eh ha kaba ïadei bad kane ka mat jong ka Reservation Policy bad ka Roster System.
Haba kylli la ka la shim ne em ki sienjam ban ïakren bad ki paralok ba don ha ka Liang Pyrshah ban pynbor ïa ka sorkar ban khot dorbar kyrpang. U Dr AJ Syngkon u la ïathuh ba kane ka dei ka sienjam kaba mynta ka dei beit tang jong ka VPP bad ong ba na ka liang ka party kan sa peit lada ka donkam ban khot ïa kiwei ki party ban pynjur ia ka jingdawa ban khot Dorbar
