Shillong, Jylliew 13: Ka AJYWO Central Body, ka pynrem jur halor ka jingshahshoh pynmynsaw jong u Talbinus Dhar na ka shnong Mulieh ha uwei u bar jylla ba la tip pynpaw kyrteng kat kum ki lad pathai khubor kum u Dharmendra Kumar Shah, u nongtrei jong ka M/s New Starlite Mobile Shop, ha jan Thomas Jones Synod College, Iawmusiang Jowai, ha ka 11 tarik mynta u bnai tang na ka daw ba u dih biri ha poh dukan kat kum ba la paw ha ki lad-pathai khubor.
“Ka AJYWO ka pynrem jur halor ka jingshim jong u tei u bar jylla ia ka aiñ ha la ki jong ki kti da kaba shoh pynmynsaw ia u Talbinus Dhar. Kane jingleh jong utei u bar jylla ka pyni ia ka jingleh-traikhlieh bad jinglehmeng jong u kat haduh ba u khlem burom shuh ia ki bor jong ka aiñ bad ruh kane ka pyni ia ka jingthmu jong u ban wanrah ia ka jingiapher Jaidbynriew bad ka huri hura hapdeng ki kynhun Jaidbynriew bad ha ka imlang ka sahlang ha ka ba kum kane ka saw ka sian jong ka jingjia ha Shillong bad ka seng ka kyntu ia ki bor jong ka aiñ ba ki dei ban pynshitom da kaba tyngeh kat kum ki kyndon aiñ ia utei u barjylla uba la mut ban wanrah ia ka huri huri sa Ri Jaintia lyngba katei ka jingleh jong u.” Ong u Bah M H Dkhar President ka AJYWO Central Body.
“Lada u Talbinus Dhar u dih biri ha katei ka dukan, ka jingpynshitom ia kiba pynkheiñ ia ka aiñ dih sikret ha ki jaka paidbah kam dei da kaba tied da u nar na khlieh haduh ba la mynsaw jur bad ka aiñ hi ruh kam shym la ai bor ia uno uno u briew ne wat ia ki pulit ruh ban leh kumta ia kiba pynkhein ia katei ka aiñ dih biri.” bynrap biang u Bah Dkhar.
“U Bah M H Dkhar u la ong ruh, “Lada u Talbinus Dhar u pynkheiñ ia ka aiñ dih sikret ha ha katei ka dukan, u tei u barjylla, u la dei ban pyntip sha ki bor jong ka aiñ ban leh ia kaba donkam haba ka Jowai Police Station ka don tang da ki phew meter na katei ka dukan hynrei ym dei ban shim pat ia ka aiñ ha la ki kti la jong, kata ruh kat haduh ba hap tied da u nar syndon na khlieh”.
“Ka AJYWO ka kyntu biang ia ki bor jong ka aiñ ban pynshitom ia utei u barjylla da kaba tyngeh kat kum ki kyndon jong ka aiñ bad ruh ban peit bniah ia kiwei pat kyndon jong ka IPC kiba ioh lehse ki dang lah ban pyngngat shuh shuh ia u tei u barjylla halor katei ka kam beaiñ jong u, khnang ba u paidbah un hun bad ruh khnang ba kan ym mih ka huri hura kynhun jaitbynriew ha ka imlang ka sahlang lashai la shisngi tang na ka daw jong ka jingshim jong utei u bar jylla ia ka aiñ ha la ki kti” bynrap biang u Bah Dkhar.
Ka AJYWO ka pynpaw ia ka jingiaroh bad jingsngewnguh ia ki pulit kiba la kem mardor bad register case pyrshah ia u tei u barjylla khnang ban pynneh ia ka shong suk ka shong saiñ ha ka thaiñ bad kumjuh ruh ia kiwei pat ki para sengbhalang kiba la kloi ban wan iarap ia Talbinus Dhar ha katei ka jingjia.
Ka AJYWO shen kan sa buddien halor ka rung ka mih, ka shong-ka sah, ka trei bylla bad ka khaii pateng jong ki nongwei hapoh u pud u sam jong ka Ri Jaintia, la ki la iaid ne em thik kat kum ki kyndon aiñ sorkar kiba ki hap dei iaid lyngba shuwa ba ka seng kan sa shim ia kawei pat ka sien jam.
