Shillong, Risaw 10: Na ka liang ka HYC ka sngew ban pynpaw ia ka jingsngew kmen ban tip ba na ka liang ka Executive committee ka KHADC hapoh ka jingialam u bah pynshaing syiem CEM, ki la shim ka rai ban pynduh noh ia ka jingaiwai sha ki riew shimet ban ai bad khrong khajna na ki bym dei ki trai jylla halor ka labour licence bad kumjuh ruh halor ka rai ban weng noh ia 134 tylli ki trading licence bad kumjuh ban pan jingpynshai shwa ban weng ia 108 ngut ki non tribal ba la ioh trading licence.
Ka seng ka ai khublei ruh ia ka jingshim khia u Bah Adelbert Nongrum, MDC ka Jaiaw halor kane ka phang. Ka seng ka la dawa na ka KHADC halor kane ha ki bnai ba la dep bad mynta na ka liang ka KHADC ka la sngap ia ka jingdawa ka seng. Ka seng ka kyntu ia u CEM ka KHADC bad kumjuh ruh ia baroh ki MDC ba na lor kine dei ban thoh kit bniah shuh shuh ia ki wei de ki trading licence kiba la ioh da ki bym dei ki trai jylla bad kat ia kito ki trading licence kiba la ioh ha ki por ba la dep kiba long pyrshah ia ki kyndon jong ka trading by non tribal regulation act bad ka rules dei ban weng noh ia ki ruh.
Ka HYC ka khim lyngti ba ka KHADC kan pyndep noh ia ka jing pynbiang ia ka bui halor ki trading licence kiba la ai khnang ba yn ioh ban weng noh kham bun shuh shuh ki trading licence. Ka seng ka kyntu ruh ba nangne sha khmat ym bit shuh ban dang ai labour bad trading licence sha ki bym dei ki trai jylla katba ia kita ki kam dang lah ban trei da ki khasi ong u bah Robertjune khar jahrin, General secretary, HYC.
