Shillong, Lber 18: ka KSU ka pynpaw ia ka jingsngewkmen ba hadien 21 snem kynthih ka jingangnud jong ka seng bad ka Jaidbynriew ka la urlong hadien ba ka sorkar mynta u snem 2022 ka la pdiang ia ka jingdawa ban ithuh noh ia ka Lady Hydari Park kum ka Phan Nonglait Park.
Khyndiat da kaba kyrtiang shadien jong ki snem kiba la leit, ka KSU ha u snem 2001 hapoh ka jingialam u Bah Danny M Khyriem ka la leit ban pynkylla kyrteng ia katei ka park sha ka Soso Tham Park hadien ba ka jingud jingnam jong ka seng ba la bun bun sien kam shym la rung sha ki shkor ka sorkar.
Hadien kane ka sorkar ha ka 11 tarik u Nailur 2001 ka la pyntip ba yn pynkylla kyrteng noh ia ka Park sha ka Phan Nonglait Park. Phewse da ki bun bun snem katei ka jingkular ka shu long tang ha ki rmiang shyntur bad ka sorkar ka khlem shim kino kino ki sienjam ban pynkylla kyrteng ia katei ka Park.
Kane ka jingmutlop ka sorkar ka la pynbitar ia ka KSU, bad ha ka 30 tarik u Nohprah 2017 kaba dei ka lyngkhuh sngi iap u Woh Kiang Nangbah bad kumjuh ha u snem uba bud ha ka 4 tarik u Ïaiong 2018 ka seng ka la pynlong jingiakhih ha khmat kane ka Park ban dawa na ka sorkar ba ka dei ban pynkylla mardor ia ka kyrteng jong kane ka Park sha ka Phan Nonglait Park kumba la kular ha u 2001.
Ka seng ka la weng ruh ia ka signboard ba thoh da ka kyrteng Lady Hydari Park bad ha jaka jong ka ka la wah da ka signboard ba thoh Ka Phan Nonglait Park bad Animal Land. Hadien kane ka seng ka la phah da ki jingthoh man ka por sha ka sorkar ban pynkynmaw ia kane ka rai ba la shim ha u 2001.
Kane ka jingleit tynruh ka seng ka la urlong ha kaba u myntri ka tnad khlaw ka sorkar jylla u James P Sangma mynta u snem u la pdiang ia ki jingdawa bad pynkylla noh ia ka kyrteng jong katei ka Park sha ka Phan Nonglait Park.
Kane ka jingpynkylla ka long ka jingmyntoi kaba khraw ia ka Jaidbynriew ha kaba kan long ym tang ka jingai nam ia ka kynthei riewkhraw ka Jaidbynriew hynrei kan long ruh kum u ksai ban ai jinghikai ia ki pateng ba mynta ba kin wad bniah shaphang ka Phan Nonglait.
Na ka liang jong ka KSU ka pynpaw ia ka jingsngewnguh ia ka sorkar khamtam ia u myntri ka tnad khlaw u James Sangma lem bad ia ka tnad khlaw baroh kawei, la ong u samla Donal V Thabah general secretary ka seng.
