SHILLONG, Nailar 09: Ka shnong Lawmei Pdengshnong ka dap da ka jingsngewnguh bad sngewburom ia ka jingstad bad jingshemphang jong u Chief Executive Member (CEM) ba donburom ka Khasi Hills Autonomous District Council (KHADC), u Bah Ardent Miller Basaiawmoit bad kumjuh ruh ia u EM Incharge Elaka ka Council u Bah K.P Pangniang bad ia baroh kawei ka EC jong ka KHADC, kiba la lah ban shimkhia halor ka jingwanrah biang sa shisien ia ka jingsngewthuh jingmut hapdeng ki nongialam bad ki nongshong shnong.
Katkum ka kyrwoh na u Bah W Lapang uba dei na Lawmei Pdengshnong, ka la pynpaw ba ka la don ka kynrum kynram naduh ki snem 2011 ha kaba iadei bad ki kam Rangbah Shnong kaba ym lah satia ban
pynbeit naduh kitei ki snem, hynrei da ka jingstad hapoh ka jingialam batbit jong u CEM ka KHADC ba mynta, la lah ban pyntreikam hok bad pynbeit ruh ia kitei ki kynrum kynram ban ioh ia u Rangbah Shnong ba pura jong katei ka shnong.
U Bah Lapang u la ong ruh ba une u snem 2014 u long u snem ba la lah ban wanrah ia ka jingsngewthuh jingmut bad na ka liang u Syiem ka Hima Mylliem bad ki observer jong ka KHADC, ki la lah ban
wan pyndep ban jied thymmai ia u Rangbah Shnong, ia kaba kane ka kam la leh ha ka 9 tarik Naitung, 2014, ha kaba ki paidbah nongshong shnong ki la ibit ban jied ia u Bah J.J Lyngdoh kum u Rangbah Shnong ka Lawmei Pdengshnong.(SP News)
