Shillong, Jylliew 27: Ka Dorbar Ki Khlieh Nongsynshar ka Ri Hynniewtrep, (Kaba kynthup ia ka Assembly of Hynniewtrep Nations, Federation of Khasi States, Ka Dorbar Ki Dolloi, Ki Sirdarship) ka sngewdei ban ai khublei ia u Bah PN Syiem, CEM, KHADC, Bah Lamphrang Blah, MDC, Executive Member, i/c Elaka, KHADC, u Bah Mansturdy Nongrem, Chairman, KHADC, bad ia baroh 30 ngut ki MDC, kiba la lah ban wanrah bad ban mynjur ia ki saw tylli ki BILL (Hima Mawdon, Hima Nongspung, Hima Nobosohphoh bad Hima Myrdon) bad ka Dorbar ka kyntu ia baroh ki 30 ngut ki MDC ban nang bteng ban shim khia ban pyndep ia kine ki jingdonkam kiba kongsan bha ha kaba iadei bad ka jingpynlong AIN (codification) ia ki Riti ki Dustur jong ki Hima /Elaka.
Ha kajuh ka por Ka Dorbar Ki Khlieh Nongsynshar ka Ri Hynniewtrep, ka iai kyrpad ia u Bah PN Syiem, MLA & MDC, Chief Executive Member, KHADC bad ka Executive Committee jong u ba kin shim khia ban thaw ki lad ban pyndep noh ia ki Bill/ Act ki Rule namar haba phai sha ka Riti Synshar India ki Shnong, Raid bad Hima/Elaka ki long beain ha kiba bun ki liang, namar ka jingbym don ki Act ki Rule kiba shai kiba la mynjur da ki bor KHADC bad kiba la mynjur da u Lat ka Jylla katkum ka para 11. jong ka Sixth Scheduled.
Ka Dorbar ka kyntu jur ia ki bor Sorkar Jylla ban shim khia ban pynsted ban pynioh ia ka jingmynjur na u Lat (Governor) ka jylla.
Ka long kaei kaei kaba sngewsih ba hadien 64 snem (1952-2016) haduh kine ki sngi ki Khadphra(18) Elaka Dolloiship bad kawei(1) ka Elaka Sirdarship ha Jaintia Hills kim pat don kawei ruh ka Act ka Rule kaban long jong ka Elaka.
Kumjuh sha Khasi Hills haduh kine ki sngi dang don sa kumba 32 na ka 54 tylli ki Hima /Elaka ki bym pat don kano kano ka Act ne ka Rule.
Wat ha ki 22 Hima/Elaka kiba la don ki Act ki Rule Hima/Elaka kitei ki Act ki Rule jong ki 22 Hima /Elaka kiba la dep pynlong Ain ki dan donkam bun ki jingpynbeit (amendment) khnang ba kin long kiba iadei ban ka jinglong jong ka por. Kum ka nuksa la donkam ban batai shai kumno ki khun ki hajar kin ioh Dorbar Shnong, lane Dorbar Raid, lane Dorbar Hima lada ki Executive Dorbar kim lum ia ka Dorbar Hima. Mano ban bah khlieh ia ka jinglut jingsep ha kaba buh ia ki office RTI khamtam ha ki Shnong, Raid bad Hima kiba kyrduh bad kibym don kano kano ka jingmih ?. Kitei khyndiat ki long ki bynta ki bym shai ha kitei ki Act ki Rule.
Kumjuh haba phai sha ka bishar khadar, Khyndaiphew(90) na ka shispah(100) ki Rangbah Shnong, ki Sordar Shnong, ki don ha ka jingdum shaphang shaphang Ka United Khasi & Jaintia Hills District (Administration of Justice) Rules 1953. Kane ka long kaba donkam bha khnang ba ki Nongsynshar Shnong, Raid bad Hima kin ioh ia ka jingshai kaba bniah ban lait na ki jingmynsaw hadien habud.
Ha Khasi Hills 11 tylli na 25 Hima Khasi States (Khyrim, Sohra, Mawiang, Malaisohmat, Nobosohphoh Nongspung, Mawsynram, Sohiong, Lyngiong, Mawdon bad Nonglwai) bad kumba 21 tylli ki Hima Sirdarship (Laitlyngkot, Myrdon, Mawmluh, Mawbeh Lahkhar, Mawsmai-Nongthymmai, Mynteng, Nongpoh, Nongkroh, Nongjri, Nongriat, Nongshluid, Nonglyngkien, Nonglait, Ramdait, Synnei, Sinai-Mawshynrut, Sohbar, Tyrna, Tynrong, Tynriang, bad Umniuh-tmar) kiba ym don Act bad ym don kano kano ka Rule, ba la ithuh da ki bor KHADC.
Ka Dorbar ka kyntu jur ia ki bor KHADC ban pynlong ain ia ki riti dustur lyngba ki Act ki Rule khnang ban pynkup bor ia ‘ki khun ki hajar’.
Ka Dorbar Ki Khlieh Nongsynshar ka Ri Hynniewtrep, ka ai jingmut ruh ia ki bor KHADC ban wanrah ia ka jingpynbeit thymmai (amendment) ia ka AIN shong kha (Marriage Act / Marriage Rule) khnang ban pyntikna ba ki ar mamla ki dei ban don ka jing pynithuh ka jingsakhi na ka ki Rangbah Kur kum shi bynta ban lait na ka sang ka ma.
Kumta, la kyrpad jur ia ki bor KHADC bad JHADC ban shim khia ban pyndep noh ia kitei ki Act bad ki Rule jong ki Hima /Elaka kum shibynta ban iada ia u pud u sam jong kane ka Ri jong ngi.
Ka Dorbar Ki Khlieh Nongsynshar ka Ri Hynniewtrep, ka kyntu ia ki bor Sorkar Jylla Meghalaya bad ki bor KHADC ba kin thaw ki lad ki lynti ban ioh ia ka jingiasngewthuh jingmut halor ki rukom treikam ka Sixth Scheduled bad ka Constitution Ri India hapoh ki Hima Khasi States.
