Shillong, Nailur 04: Ka FKJGP Sengkmie lyngba kane ka kyrwoh ka ai Khublei Sngi burom ia ki Nonghikai sha baroh ki Nonghikai naduh ki Skul rit, skul bah, Colleges bad sha ki University bapher bapher kiba don ha ka Jylla Meghalaya hi baroh kawei kynthup ruh sha baroh ki Nonghikai jong ki Institutions, Training Center, Skills Development Agencies lem bad sha kiwei kiwei ki ki Shlem ai jinghikai kiba pher bapher ia kiba ym lah ban jer kyrteng lut hangne.
Ka FKJGP Sengkmie ka shim ia kane ka kabu ban ai khublei kyrpang namar ba ym lah ban len ia ka jingshisha ba dei lyngba ka mynsiem shakri bad jing aiti lut met bad mynsiem jong ki Nonghikai ha ka jingtreikam kaba jar jar ka jong ki ha ki Shlem saindur (Jaka Pule) bapher bapher ban hikai ym tang ia ka jing nang jingtip, hynrei ia ka akor ka burom bad khamtam eh ban plié ki lad ki lynti ia ki samla pule khnang ba kin lah ban jam shaphrang sha ki Mawmer ban saindur iala ka jong ka jingim naka bynta ka lawei kaba phyrnai.
Lyngba ka jingshakri jong ki ka jylla ka la lah ban sei bad pynmih ia shibun ki Khraw pyrkhat, Riew Shemphang bad ki Proh jabieng ban tei bad saindur pat ia ka jylla bad ia ka Ri hi baroh kawei. Ka Seng FKJGP ka sngew ba ia u Synniang u bynhei ba la noh da ki Nonghikai ym lah satia ban niewtang ia ki hynrei la sakhi ba kidei ki Paia Khnong ba kongsan tam ha ka jaitbynriew.
Ha kawei pat ka liang ka FKJGP Central Body ka noh mynsiem shikatdei eh ba iohi ia ka jingleh kuman bad mutlop jong ka Sorkar Jylla halor ki jingeh jong ki Nonghikai kiba ju iakynduh naka por sha ka por haduh baka la poi sha u Pud ba kine ki Paia Khnong (Nonghikai) ki hap ban mih sha surok bad pynlong ruh ia ki jingiakhih kiba pher bapher ban dawa iala ka jong ka Hok.
Ka Seng FKJGP ka buh ruh ka jingkylli sha ka sorkar ba ‘Hato kita ki Nong mihkhmat kiba la ju tip ba ki dei ki Nongthaw Ain kila klet mo ia ka Thymmei nangno ki mih bad nangno ki ioh ia ka jing nang jing tip ???’ Ka long ka jinglehrain kaba kharw shikatdei eh ia ka Sorkar Jylla kaba ju kynmaw ia ki Nonghikai tang shisien ha ka shisnem kata tang ha ka 5th September da kaba shu pynlong tynneng ia ki Programme kiba pher bapher ban rakhe ia ka Teachers Day tang kum ka jing pyndep rukom wat ban tap eit miaw ia ki jing mutlop bad jing kuman ha ki por baroh.
ka FKJGP Seng kmie sa shisien pat ka ai khublei bad ai mynsiem ia baroh ki Nonghikai ba kim dei ban duh mynsiem satia wat la ki iakynduh ia ki jingeh namar ka Seng hi kan don beit ha syndah jong ki ha ki por bad ki jingeh baroh, ha kajuh ka por ka Seng ka kyntu ruh ia ka sorkar jylla baka dei ban shimkhia ban peit bad khmih bniah ia ki jingeh jong jong ki Nonghikai kum kawei na ki mat ba ha khmat eh khnang ba yn lah ban weng lut ia kine ki sohkyrdot kiba la pynring swai ia ka pule ka puthi ha ka jylla. Kum ka Seng ki da nangnud eh bad ngi don ka jingkyrmen kaba skhem ba dei tang lyngba ka jing iamir jingmut bad ka jing shimkhia yn lah pat ban kyntiew bad ban saindur thymmai ha ki liang baroh naka bynta ka jingkiew jong ka jylla.
