Shillong, Nohprah 11: U Bah Ashok Kharkongor bad ka kong Anita Lyngdoh Nongpuir kila pynpaw ia ka jingsngewnguh ia baroh kito kiba la ai ka jingkyrshan jong ki, ia u khun u samla Shanbor Lyngdoh Nongpuir ha ka jingiakop ia kura kaba la long ha Ri Thailand.
U Bah Kharkongor, haba kren ha ki nongthoh khubor mynta ka sngi ha ka jingiadon lang bad ka kurim jong u ka kong Anita u la pynpaw ia ka jingsngewnguh ia baroh kito kiba iala iarap ha ki liang baroh ha kane ka jingleit. Ha kane ka jingiakop u la rah ruh ia ka takma ksiar kaba long ka burom ia ka Ri Baroh kawei.
Ka jingiakop ia kura kaba la ia shim bynta une u khun jong ki la tip kum ka International Jeet Asian Gold Cup. Ha kane ka jingiakop u la ioh rah ia ka takma ksiar bad kane ka logn ka burom ia ka Ri bad ka jylla. Kum ki kmie ki kpa ki ai khublei ia baroh kiba la iarap ia u khun jong ki ha kane ka jingleit ia kop.
La iathuh ba ha dien ba u la wan phai na kane ka jingiakop, u Lat jong ka jylla u la pynkup burom ia u samla Shanbor Lyngdoh Nongpuir, ha kaba u DIG jong ki BSF u la don lang, ka Shong Bishanapur kan sa pynkup burom ha ka 18 tarik mynta u bnai bad kum juh ka seng Khasi haka 27 tarik mynta u bnai hi.
La iathuh ba u samla Shanbor mynta u dang pule ha ka Class XI hapoh jong ka BSF School kaba donha Umpling bad mynta u dang pynkhreh ban leit ban ia shim bynta ruh sha bar jong ka Ri India ha u snem ban wan.
