Banbudai, Ïaïong 07: Ka surok kali ha Banbudai kaba la pynmang banpyndep lyngba ka skhim Padhan Mantri Gram Sadak Yonajana (PMGSY), na Umsning Mawrong Road sha Banbudai, kaba jngai kumba 4 kilomitar, ka la shu sahteng noh ha kine ki bnai ba la lah tang na ka daw ka jingpynsangeh na ka liang ka tnat shna surok jong ka sorkar ka PWD.
U Rangbah Shnong barim, uba la long teng ruh u Secretary shnong, u Bah B.D Laloo, bad nongthoh khubor mynta ka sngi, u tei u rangbah u la kynnoh ba ka jingsahteng jong kane ka surok ka dei na ka daw ba ka PWD ka la pynsangeh shuwa ia mynta shipor, da kaba ai bun tylli ki daw kiba kum ka shnong kam lah ban sngewthuh balei ba katei ka surok kaba la pynmang ban pyndep ban siang rong noh ia ka, la shu pynsahteng noh.
Ha kaba iadei bad kane, na ka liang ki paidbah nongshong shnong ki dawa na katei ka tnat sorkar ba dei peit ia ki kam shna surok ba ka dei ban ai jingpynshai ha kano ka rukom ba katei ka surok la pynsah teng noh, khamtam kane ka dei ka skhim PMGSY jong ka sorkar pdeng.
La ong ruh ba kum ki nongialam shnong ki la leit kynduh ruh ia ki ophisar katei ka tnat sorkar ban ia kren halor kane ka jingpynsangeh, hynrei na ka liang katei ka tnat kam shym la shim khia bad kam shym la sngew ne sngap ia ka jingkyrpad jong ka dorbar shnong kiba la leit banmih khmat da ki nongialam shnong.
Ki nongshong shnong ki la ud ruh halor kane ka jingpynsangeh bad ki dawa ruh ba ka tnat PWD ka dei ban pyntrei noh mardor ia katei ka surok hapoh ka 1 taiew bad lada ka PWD kam sngew halor kane ka jingdawa, na ka liang ki bor shnong kim banse ban iaid da kawei pat ka lynti, la bynrap.
La ong lada ka PWD ka pynsangeh, kan wanrah ia ki jingeh ba khraw ia ki paidbah, khamtam ha ka por lyiur ia ki khynnah skul, kiba katei ka surok ka long kaba sniew ha ka iaid ka ieng, kumjuh ruh ia ki nongrep, namar na katei ka shnong kiba bun na ki nongrep ki donkam ban pyniaid ïew ia ki mar rep jong ki, kum ki jhur, ki soh bad kiwei kiwei ki mar rep, te lada katei ka surok la pynsangeh noh ia ka ban trei dep da ki kontraktor, kan long ka mawjynthut bad diengpyngkiang kaba khraw eh ia baroh ki paidbah bad khamtam eh ia ki nongpang ki bym lah ban iaid ban ieng na katei ka shnong ban wad dawai dashin sha ki jaka sumar jong ki.
Ha kaba iadei bad kane ka surok, katkum ka jingpynbna paidbah ba la wah ha ki lad ka shnong, ka long ba ka jingjrong jong kane ka surok ka long 4 km bad ka jingsdang ban shna ka long naduh ka 4 tarik Iaiong , 2012, hynrei kaba la pynsangeh noh ia u kontraktor, u Bah T Dorphang, da ka tnat PWD.(SP News)
