Shillong, Nailur 07: Na ki lai tylli ki District Council ha ka jylla Meghalaya ka, KHADC, JHADC bad ka GHADC, na kine kiba la dep ban ai ia ki skhim sha ka sorkar b aka committee kaba la khlieh da u Chief Secretary ka jylla kan ai ia ki jingmynjur katkum ki kyndon kiba la buh da ka sorkar pdeng, kiba la dep ban ai dei tang ka GHADC.
Kaba sah mynta ka sorkar kan hap ban pynlait noh ia ka T.100.7 klur kaba dei ka bhah jong ka GHADC namar ba kala dep ban pynbiang lut katkum ki jingdon kam kiba la buh da ka sorkar pdeng. Ka committee kaba la khlieh da u Chief Secretary kala pdiang ia ki skhim jong ka GHADC.
Katba ka KHADC haduh mynta kam pat phah ia ki skhim sha ka sorkar jylla ba katei ka committee kaba la khlieh da u Chief Secretary kan shong ban bishar bniah laki biang ne em katkum ki kyndon kiba la buh da ka sorkar pdeng bandup ioh ban pynlait noh ia ka pisa kaba la kot sha ka T.133 klur.
Na ka liang jong ka JHADC, haduh mynta ka dang phah tang ia ki skhim hynrei kam pat phah pat ia ki jingbtai bniah ha kaba ia dei bad ki skhim kiba kan sa pyntrei na kane ka pisa kaba la ai kyrpang da ka sorkar pdeng na ka bynta jong ki District Council.
Ki thymmei khubor napoh jong ka tand pla pisa jong ka sorkar jylla la ong ba ka sorkar mynta kam lah shuh ban pynslem ne dang bat ia ka pisa jong ka GHADC namar ba kila dep ban pynbiang ia ki jingdon kam baroh katba ka KHADC tang ia ki kyrteng jong ki skhim ruh kam pat phah sha ka sorkar.