Jowai, Jylliew 17: Da ki spah ngut ki samla pule na rilum Jaiñtia kiba la pyndep ïa ka Matrik kumjuh ruh ïa ka klas XII kiba angnud ban bteng ïaka jingpule jong ki kila shah kyntait ban ioh rung klas ha Kiang Nangbah Government College.
ki nongialam ka Kiang Nangbah Government College Student Union (KNGCSU), u samla Batkupar Lamurong, ula ong ba halor kane ka jingshah kyntait ki samla pule ban ioh rung klas ha katei ka College ki la dep ban ujor sha Directorate of Higher and Technical Education ka jylla bad kumjuh ruh sha u Myntri ka kam pule puthi, Dr. RC Laloo, hynrei haduh mynta ym shym la lah ban pynbeit ïa kane ka kam.
u nongialam ka KNGSU, ula ong kine ki samla pule kiba angnud ban bteng ïa ka jingpule ha kane ka College, kaba dei tang maka ka College Sorkar kila kot sha ka 700 haduh 800 ngut kaba kynthup ïaki dang shu pass iaka Matrik, XII kumjuh ruh kiba pass naka NIOS.
Une unongialam u la ong ba kum ki nongialam ki la dap da ka jingbyñniaw hadien ba ki para samla pule kila shah kyntait ban iohrung pule ha ki bor pyniaid ka College bad kila iakren bad u Director ka tnad Higher and Technical Education ban dawa na u ban pynheh kamra klas ban ioh rung klas ki samla pule kiba dang angnud ban bteng iaka jingpule jong ki.
La iathuh ruh ba kila iakren ruh halor ka jingduna nonghikai katei ka Collge, hynrei haduh mynta ka tnad kam pule puthi kam shym la lah ban pynioh ïaki jingdawa ka union na ka bynta ban pynbha ïaka College.
“Kane ka jingleh mynthi ka sorkar ka ktah shikatdei eh iaka samla pule kiba dang kwah ban bteng iaka jingpule jong ki”, ula ong u Batkupar Lamurong, haka juh ka por ula ong ba ka sorkar bunsien ka kren na ka bynta ban pynbha iaka pule pule puthi bad haba phai sha kane ka kolej I kumba ka sorkar ka pynshlur iaki samla pule ban iehnoh iaki jingpule shiteng por.
Kumba long mynta ka jingpass ki khynnah kiba iakhun ia ki eksamin SSLC, HSSLC ba kynthup iaka Science bad Arts, ka pass percentage jong ka West Jaiñtia Hills District kala nangkiew haba ianujor bad kiwei kiwei snem, hynrei ka jingkylli mynta pat hato ka sorkar kala long kaba pynkhreh na ka bynta ban pynbha iaki jaka pule.
