Shillong, Iaiong, 11: Ka Dorbar Shnong jong ka Kynroh Nonglyer kaba hap hapoh ka Sohiong Lyngdohship, East Khasi Hills, ka la rai ban ym ai shuh ia ki marbam ba la sam lyngba ka Public Distribution System (PDS) sha ki katto katne ki longkmie kiba don hapoh ka shnong.
Ia ka rai la shim da u Bah Kwit Kyrsian, uba long u Sordar Shnong bad u Bah Faithstar Nongtri, uba long u Secretary Shnong. Namar kane ka jingshah pynduh jong kine ki longkmie ia la ka hok, ki la leit ujor sha ka Civil Society of Women Organisation (CSWO).
Ka CSWO ka la phah syndon da ka dorkhas sha u Bah Ardent M. Basaiamoit, Chief Executive Member (CEM) ka Khasi Hills Autonomous District Council (KHADC) ban leh da kaba tyngeh ia kito kiba donkti ban khanglad ia ki longkmie ban ioh ia ki jingbam reshon hapoh shnong.
Ha katei ka dorkhas ba ka CSWO ka la phah mynta ka sngi thohdieng sha u CEM ka KHADC, i Kong Agnes Kharshiing i la pyntip ba katto katne ki longkmie kiba shong basah hapoh ka shnong ki la leit ban iashim bynta ha ka dorbar kaba la long ha ka sngi palei, hynrei ynda ki la rung hapoh, ki la shah beh pynban ha u Sordar Shnong bad ha u Secretary Shnong.
ka Kong Agnes i la ong ba ka Dorbar ka la shim da ka rai ban ym shah satia ia ki longkmie ban kren ha ka ei ei halor ki mat kiba ktah ia ka imlang ka sahlang, bad dei halor kane, ki la shah pynduh ruh ia ka hok ban kren bad ia ka jingiaryngkat (ritght to expression bad right to equality).
Ka la ong ruh ba ki jingbam reshon, ki dei kiba la bhah na ka skhim jong ka Sorkar Pdeng ha kaba ym shym la kyntait satia ia ki longkmie ban shah pynduh noh ia ka hok jong ki. “Kane ka jingleh jong ka Dorbar Shnong ka long ba khnoit ia ka hok jong ki kynthei kiba don hapoh shnong kiba ioh ia hok ban bam (right to food),” i la bynrap.
Ka CSWO ka la kyntu ruh ia KHADC ba ka dei ban shim da ka rai kaba tyngeh halor kane khnang ba ki kynthei ruh kin ioh ia kajuh ka hok ban iashim bynta ha ka Dorbar khnang ba kan ym don kano kano ka jingshah niewbein ha ka shnong ka thaw.
Ka Seng ka la dawa ruh na ka KHADC ba ka dei ban weng noh mardor ia u Sordar bad ia u Secretary ka Dorbar Shnong Kynroh Nonglyer na ka kam kaba ki bat namar kane ka jingleh jong ki ka long kum ka jingpynhiar kput, da kaba kyntait ban ai ia ka hok sha ki kynthei ha ka imlang ka sahlang.(SP News)
