Shillong, Nailur )2: Namar ba ka sorkar kam shym la siew tulop mynta la san bnai ki 450 ngut ki nurses ha kane ka jylla Meghalaya na kaliang jong ka seng Federation of Khasi Jaintia & Garo People (FKJGP) seng kmie bad na Nongthymmai mynta ka sngi ki la leit ban ia kynduh ia u myntri ka koit ka khiah jong ka jylla u Bah AL Hek ban dawa na u ba dei ban siew noh ia kane ka tulop ka jong ki.
La ong ba tang ha Jiantia Hills ki nurse kiba khlem pat ioh tulop ki long 135 ngut bad haba shim bad kiwei ki bynta jong ka jylla kala long palat ia ka 450 ngut ki nurse kiba khlem pat ioh tulop mynta la san bnai la ong u Bah Eldie N Lyngdoh nongai ktien jong ka seng.
Haba kren ha ki nongthoh khubor ha dien ba la dep ban ia kynduh ia u myntri la ong ba na ka liang jong u myntri kaei kaba u ong bay n sa peit ia kaba don kam hynrei ym shym la ai kano kano ka jingkular lano ban siew ia kane ka tulop jong ki nongtrei. Nalor kane ka seng kan sa leit ruh ban ia kynduh ia u heh kane ka tnad sorkar.
Ka sorkar ka dei ban shim khia ia kane ka kam kumba ka shim khia ia ki nonghikai, ha ka juh ka por la kyntu ruh ia ka sorkar ba ia ka Dispensary kaba don ha Rynjah la dei ban kyntiew kyrdan noh sha ka PHC.
