Shillong, Risaw 20: Ki seng balang na Jiantia Hills, ka Jaintia Student Union(JSU) bad ka Jaintia Youth Federation (JYF) mynta ka sngi kala ia kynduh ia u secretary jong u Lat ka jylla u bah HM Shangpliang ban ia kren halor ki kam bad kala don ka jingsuba ba ka don ka jingiabamsap hapoh jong ka JHADC kaba la palat ia ka ar klur tyngka.
U Bah Rikut N Parin president jong ka JSU haba kren ha ki nongthoh khubor mynta ka sngi ha Shillong Press club u la ong ba ka jingwan jong ki mynta ka sngi sha Shillong ka long ban ia kynduh ia u Lat jong ka jylla u V. Shanmuganathan hynrei namar ba u hap ban leit sha Delhi kila ia kynduh noh ia u secretary u Bah HM Shangpliang.
Kane ka jingkynnoh bamsap ia u CEM barim jong ka JHADC u Bah Modonbai Rymbai, u Bah Rikut u la ong “ ngi la lap ia kane lyngba jong ka RTI, ba kala don ka jingpyndon kam bakla ia ka pisa ha kaba ia dei bad ka bai buria jaka ha Khliehtyrshi bad Lumpuhsih bad ia ka pisa shnong, kala don ruh ka jingujor da ka FIR”. Kum ka seng kila ia kynduh ia u Lat ba rim jong ka jylla u JK paul bad ia heh pulit hynrei haduh mynta ym tip sha kaei kala poi.
Ha kane ka jingia kynduh mynta ka sngi ia u Bah HM Shangpliang u la ong ba ia kane ka jingia kren yn sa rah sha u Lat jong ka jylla bad hapoh ka shiphew sngi un sa ai jingtip sha ki nongialam jong ka seng. Na ka liang jong ka seng ki don ka jingkyrmen ba u Lat ka jylla un sa shim khia ha kaba ia dei bad kane ka kam.
Haba ia dei bad kane ka jingkynnoh bamsap kaba dei jong ka Lumpohsih ka dei T.1.15 klur bad kaba dei jong ka JHADC pat ka poi sha ka T.1.18 klur. Na ka liang jong ka seng ka dawa ba dei ban pynshitom ia kiba don kti katkum ka ain bad ki kwah ba u Lat jong ka jylla un tuklar ia kane ka kam.
Bah P Majaw president jong ka JYF, u la ong ba naduh ba ki la ia kynduh ia ki heh sorkar halor kane ka kam kala iaid mynta la ar snem tam, ki paidbah ki don hapdeng ka umdum, kum ka JSU bad ka JYF ki kyrpad ia u Lat ka jylla ba un tuklar ia kane kam ym ban shu pynslem kai ia kane ka kaiphot.
Ka jingtohkit na ka liang jong ki pulit kila ong ba kila dep ban tohkit hynrei kim pat lah ban ai paidbah namar ki donkam ia ka jingbit jong ka sorkar, hynrei mynta ka shu shah kut bad ka sorkar, balei kiew sha ing jong u Lat ka long ban dawa ba dei ban pynkloi noh ia kane ka jingtohkit.
Kum ki seng bhlang ki don ka jingkhohnioh namar ba u Bah CEM barim u dei na ka seng Congress bad ka sorkar ruh ka dei na ka seng Congress ia mat ka don ka jingiada namar ki dei na ka juh ka party, la kynnoh u Bah P Majaw president jong ka JYF.
