Shillong, Naitung 11: Ka Joint Action of Social Organisations (JACSO), South West Khasi Hills District, kaba kynthup ia ka SSSS, HYC, FKJGP, SPDF, HANM, HNYF, WKSU, MIYF bad SWKYF, kan pynlong ia ka Jingialang Paitbah ha Mawkyrwat, ha ka 16th mynta u bnai ha ka por 11:00 baje mynstep ban pynshai paitbah halor ki kynrum kynram kiba mih ha kine ki sngi, halor ka surok 2 Lane na Nongstoin sha Mawthabah bad halor ka Tender pynkhreh tih Uranium ka UCIL hapoh ka South West Khasi Hills District.
Ka JACSO da ka mynsiem kaba khia bad ka jingsngew kitkhlieh ia la ka ri ka muluk, hadien ba ka la iohi ia shibun ki jingpynklumar jingmut ia ki paitbah baroh hapoh ka District lyngba kita ki jingpynheh surok ha ka kyrteng ka roi ka par. Hadien kata kaba paw shynna pat mynta ba kata ka roi ka par ka wan pawdur ryngkat ka jingpynkhreh ban wanrah ia ka srngeiw jong ka jingkhlaw ia Uranium hapoh kane ka District.
Katkum ki jingwad bniah ba thikna da ki bor Stad Saian U Uranium u don ha baroh ki bynta jong ka South West Khasi Hills District bad ka West Khasi Hills ha kaba ka Mawthabah-Domiasiat Area ka dei ka jaka ban sdang ia ka Open Cast Mining bad ka Processing Plan.
Ka Lynti bah ba kylluid sha Mawthabah shano kan ialam ia ka Ri, sha ka jingim ne ka jingiap kylli ka JACSO, kum ka kynhun ka kyrpad ia ki paitbah khamtam ki Rangbah Shnong, ki Seng Longkmie, ki Seng Samla jong ki Shnong, Ki Seng Bhalang, Ki Seng Niam, ki Samla Pule na ki Skul bad ki College, ki Khlieh Nongsynshar Hima-Sima, Ki riew Saiñ Pyrthei bad kiwei kiwei ba kin ia poi ha katei ka sngi. Kane kalong katkum ka kyrwoh kaba la phah da u Chairman ka JACSO, u bah Wallambok Syiemiong.
