Shillong, Naiwieng: U CEM jong ka KHADC u bah HS Shylla, haba jubab ia ka jingkylli jong ka kong Grace Mary Kharpuri halor ka phang la ka don ne em ka jingsiew ia ka bai dawai jong ki nongtrei hapoh jong ka KHADC, u CEM u la ong ba kim shym siew namar ba kam don pisa.
Haba jubab ia ka jingkylli ha kaba ia dei bad ka arrear kaba dang sah na ka liang jong u CEm u la ong ba ia kane ka shong ha ka jingdon ka pisa. Haba jubab kyllum pat ia ki jingkylli bynrap na ka liang jong u CEm u la ong, ban ia nujor bad kiwei ki District Council ha ka jylla ka KHADC ka dang lah ban peit ia ki nongtrei.
Haba ia dei bad ka jingiarap ia ki nongtrei haba ki pang ki shitom, la ong ba na ka liang jong ka KHADC kala khot ia kren ia ka Oriental Insurance Company ban ia kren ia kane ka phang bad ba kin wan ai jingshai ia ki nongtrei ka KHADC.
Katkum ka jingiakren ka long ba lada lah ban siew T.300 tyngka shibnai, ka company kan lah ban bei ia ka bai sumar haduh T.3,00,000/- tyngka ha ka shisnem. Mynta ka dang don ha ka jingiapynbeit lada ki nongtrei bad ka KHADC kin ia siew lang marshiteng.
Haba ia dei bad ka Monolith Festival ha Mawphlang, u CEM u la kren shai lada ka sorkar ka bei pisa kin pynlong, hynrei na ka liang jong ka KHADC kam don pisa ban pynlong. Halor ka jingduh jong ki iing ha katei ka Heritage Village, ha dien ka Session ka EC kan sa leit ban peit.
