Shillong, Jymmang 26: Ka HYC Shella Area Unit hapoh ka jingialam u President Samla Aibok Swett, Samla Seiborlang Diengdoh, General Secretary, Batyngshain Natep, Vice President ha ryngkat ki dkhot jong ka Seng, kum shi bynta ban ia snohkti lang ha ka jingiakhun pyrshah ia kane ka khlam Covid-19, mynta ka sngi ka 25 tarik u bnai Jymmang, ka lah pynlong ia ka prokram synreit dawai ha poh Shnong 
Shella bad ki Shnong ba marjan.
Ia kane ka prokram lah sdang na Kher Sohlap-Umdoh-Mawpot kaba dei ka jaka ba pynlong ia ka Hat Shella ha kaba lah ioh ban synreit dawai ia ki dukan, ki lynti syngkieng bad ki sawdong sawkun jong ki ing ki sem kiba don hapoh ka jaka long iew.
Ki dkhot ka Seng ki lah ioh ruh ban pyndep ia ka jingsynreit dawai ha Kher Pyrkan, Disong, Duba, Jamew, Jasir bad Mawryngkhong. Kyrpang lah pynlut por ruh ban synreit dawai ia ka Shella PHC bad Sohlap Sub-Centre kiba dei ki jaka ai jingsumar ia ki paidbah jong ka dong ka thain khamtam ha kum kane ka por.
Ki dkhot ka Seng ki la ioh ruh ban leit synreit dawai ia ki dukan bad ki lynti iaid ha ryngkat ki sawdong sawkun jong ka jaka iadie iathied ki paramarjan Shnong kaba don ha Jatap, Elaka Mustoh.
Na ka liang ka Seng ka kyntu ia ki paidbah Nongshong Shnong ka dong ka thain ba kin long kiba phikir bha bad sumar ialade ha kum kane ka por ba une u Khniang jingpang u lah sdang ban pur stet bha ha kane ka Jylla bad ka dong ka thain ka jong ngi da kaba bud ryntih ia ki kyndon bad ki jingbthah jong ka Sorkar kum ban tap ia ki Mask, ban nym ia lum paidbah ha kano kano ka jaka bad ban sait ia ki kti man ka por.
Na ka liang ka Seng ngi phah ruh ia ka khubor sngewlem sha ki bahaing ha sem jong kito ki parashnong parathaw kiba lah khlad noh na kane ka jingpang Covid-19 bad kumjuh ruh ngi kitbok ia kito ki parashnong kiba lah ioh ia kane ka jingshitom bad shah sumar ne shah set slung ha ki ing ki sem ki jong ki ba kin ioh noh ia ka met kaba koit ba khiah kham kloi.
