Shillong, Nailar 25: Ka Meghalaya Aids Control Society (MACS) ha ka jingiakhun pyrshah ka jong ka ban khanglad ia ka jingsaphriang jong ka jingpang Aids ha kane ka jylla Meghalaya, mynta ka kynti ruh kan sdang biang ban pynlong ia ka jingiakop rwai ha ka jylla ia kaba la tip kum ka “Meghalaya Icon-6”.
Kane ka jingiakop rwai kan sdang ha ka 10 tarik jong u Nailur bad kan kut ha ka 7 tarik jong u bnai Risaw mynta u snem. Kin sdang ia kane na Tura ha ka 10 tarik, ha Nongstoin kan long 17 tarik, 24 tarik kan long Jowai jong Nailur bad ha u bnai Risaw kan long ha Nongpoh 1 tarik bad yn pynkut ha Shillong ha ka 7 tarik.
Ka Dr B Mawthoh haba kren ha ki nongthoh khubor mynta ka sngi kala ong ba ka jingpynlong ia kine ki jingiakop rwai ha kaba ka MACS kan ai ia ka khusnam kaba T.2.5 Lak tyngka sha nongjop, ka jingthmu kaba kongsan ka long ba lyngba ka rwai ka siaw kin pynshai paidbah ba kumno ban khanglad ia ka jingpang Aids na ka jingsaphriang jong ka.
La ong ba kino kino kikynhun tem kiba kwah ban ia shim bynta ha kane ka jingiakop ka long ba ki hap ban phah examin ia lade ha ki ICTC kiba don ha man ki District jong ka, lane ba kin leh ia kane ka test ha ka jaka ba kin wan ban ia shim bynta.
Ka Dr Mawthoh kala ong ba da kaba pynlong ia kine ki jingiakop rwai ki paidbah mynta kila sdang ban sngewthuh ia ka jingsniew jong kane ka jingpang kaba saphriang na u wei u briew ne ka briew bad kumno ban kiar. Kane ka jingpang ka saphriang ha ki saw rukom, ka jingshongkha pathar kaba khlem iada, ka jingai snam kaba khlem da test, ka jingia inject ia u juh u thyrnia bad kaba saw ka dei ka na ka kmie kaba ar met ka ngat sha ki khun.
