Shillong, Nailar 31: Ban pynjanai ia ka “Lineage Bill” jong ka Khasi Hills Autonomous District Council, mynta ka sngi kala don ka jingiakynduh hapdeng ki ar ngut ki CEM jong ki ar tylli ki District Council, u bah HS Shylla na ka KHADC bad u Ma Madonbai Rymbai jong ka JHADC ha Jowai.
Ha kane ka jingiakynduh kaba la long mynta ka sngi, ka long ba na ka liang jong ka KHADC, kala pan jingmut na ka bynta ban pynbha ia ka bill kaba la pdiang da ka iing dorbar hapoh jong ka KHADC ia kaba kila pan biang na ka sorkar ban pynbha bad ban pynjanai ia ka Bill,
Katba na ka liang jong ka JHADC namar ba kim pat don ia kane ka Bill, ka JHADC kala pan jingpynshai na ka KHADC namar ka JHADC ka hap ba sna thymmai ia kane ka Bills. Kane ka jingiakynduh jong ki CEM jong ki ar tylli ki District Council ka long ban ia mir jingmut ban pynioh ia ka Lineage Bill kaba janai.
Ia u CEM jong ka KHADC la synranlang da u Bah Adelbert Nongrum u ba dei u MLA bad MDC, u nongaibuid ha ka liang jong ka ain u Bah Erwin Sutnga lem bad kiwei kiwei ki dkhot jong ka kynhin iathier na ka KHADC.
Na ka liang jong ka JHADC kila don bun ki MDC kiba la synran lang ia u CEM u Ma Madonbai Rymbai ha kane ka jingiakynduh ban ia mir jingmut kumno ban pynbha ia ka Lineage Bill jong ka KHADC bad na ka bynta ka JHADC ka long ban wanrah ia ka bill kaba thymmai.
