Shillong, Rymphang 10: Kum ka jingthmu ban ai jingkyrshan ïa ka Central Executive Committee ba kan lah ban trei khambha ha ha ka ilekshon jong u snem 2023, ka United Democratic Party (UDP) State Youth Wing kala rai ban pynlong ban jied noh ia ki nongkit kam ba thymmai.
Na ka liang jong u Bah Kynsai Bareh uba dei u General Secretary ka UDP State Youth Wing haba ia kren bad ki lad pathai khubor u la ong ban pynkhlain ia ka party ha ka jylla kum ka youth wing ngi la ia tai sani bha kumno ban pynkhlain ia ka party ha ka jylla lyngba ki District bad ki Constituency bapher bapher ban pynkhlain ia ka party shwa ka ilekshon 2023.
U bah Bareh u la ong ba ka youth wing ka kyrmen ba ka party kan leh bha ha u 2023 bad ki paidbah kin phai khmat sha ka.
Ha kane ka jingiakynduh lang, ki nongialam ka UDP State Youth Wing ki la rai ban pynlong ha ka 28 tarik u bnai Rymphang ban jied ia ki nongkit kam ba thymmai ha ka por 11 baje ha iing sah jong u (L) Dr Donkupar Roy bad u la wer ia ki khun samla jong ka UDP na kylleng ki District ka jylla ban poi sha katei ka jingialang la kumno 20 ngut na kawei ka District.
Na ka liang jong u President ka UDP State Youth Wing u Bah Embhah Syiemlieh u la ong, “Ngi sngewthuh ka party UDP hadien ba ia trei lang bad ka sorkar MDA ngi sngewthuh shai ba ki don ki jingsei soh jong ka jingtrei kam ka party”.
U Bah Embhah u la kdew ia kawei ka mat kaba la lah ban urlong kadei ka jingpynjlan ia ka rta thung kam thung jam jong ki khun samla bad ha ki snem kiba kham mynshwa ha kawei na ki jingialang ba heh bha ngi la ioh ban ai jingmut na ka state youth wing ban pynjynsur ha kaba iadei bad ka rta ha ka thung kam thung jam
Na ka liang ka state youth wing ki dang don ka jingthmu ban dang pynkhlain shuh shuh ia ki samla bad donkam ruh ia ka employment policy ka ban thaw lad ha ka ioh kam ioh jam ki samla bad ruh ban don ka Tourism Policy bad kane ruh kan kyntiew ia ki samla ha ka ioh kam ioh jam u la ong.
Ha kaba iadei bad ka Youth policy na ka liang ka State Youth Wing kila pyrshang ban wanrah ia ka jingiatai bad ngeit skhem ba ki jingai jingmut kin urlong bad ngeit ba ha kane u snem 2023 ka UDP kan leh bha bad ki paidbah kin phai sha ka party UDP bad ngin ialam ia ka sorkar da ka party UDP bad ngeit ki jingangnud yn lah ban pynsei soh ong u Bah Embhah.
Ha kane ka jingialang jong ka UDP State Youth Wing la don lang ryngkat ki MLA ba kynthup ia u Bah Pius Marwein bad u Bah Kyrmen Shylla kynthup u Bah Jemino Mawthoh, u Bah Paul Lyngdoh, u Bah Allantry Lyngdoh bad kiwei kiwei de.
