Shillong, Risaw 04: Ka sorkar ka sngewkhia jurbha halor kane ka jingkhapngiah ki kali ha ki surok ha kane ka nongbah Shillong bad khamtam ia ka jingsahkut kali hapoh ka GS Road ha ki bynta jong ka Mawlai, ha kaba bun sien ki nongleit nongwan ki sah kut da ki palat kynta.
Na ka liang jong ka tand shna surok jong ka sorkar jylla kala wad kilad ki lynti kumno ban pynlait ia kane ka jingkhapngiah kali, na ka liang jong u myntri ka tand shna surok jong ka jylla u Martin M Danggo u la leit ban jurip ia ka surok na Mawlai Umjapung kaba mih sha NEHU kaba pyniasoh bad ka VIP Road ban pynheh ia kane ka surok khnang ban pynsuk ia ki nongleit nongwan.
Ha dien ba u myntri u la wan jurip ia kane ka surok, u la iohi ba lada ka sorkar ka lah ban ioh jaka ban pyneh ia kane ka surok kan iarap shibun ha ka ban pynlait ia ka jingkhapngiah kali ha ka surok bah GS Road bad ki bynta jong ka Mawlai bad ban rung sha kane ka nongbah Shillong.
Na ka liang jong u myntri ka tand shna surok , u la iohi ba kane ka surok kan pynsuk ia ki briew kiba wan don kam sha ki ophis sorkar ha kaba kim don kam shuh ban rung sha Mawlai bad na kane ka surok kin iaid beit sha NEHU bad poi sha kiwei kiwei ki bynta jong ka nongbah Shillong.
Kiwei ki surok kiba ka PWD ka kwah ban pynheh ia ki surok ka long ka VIP Road kaba pyniasoh na Mawlai sha Ri Bhoi lyngba ka Airport, ka surok na Nongmynsong sha Shillong by-pass. Ka sorkar ruh ka dang wad jaka mynta ban pynlait ia ka surok na Lum shyllong sha Laitkor khlem da iaid shuh na ka surok jong ki shispai suin.
