Shillong, Jylliew 15: Ka Khasi Students’ Union Mawiongrim Unit ha ka 14th tarik Jylliew 2016 kaba dei ka sngi rakhe ia ka Lyngkhuh jingdap hynniew snem jong ka Unit, la plie ia ka sem ap kali (Bus Shed) ha Mawiongrim. Ha kane ka sngi la wan ban plie pyrda da u President Rangbah ka KSU Seng Kmie Samla Daniel Khyriem ha ryngkat ka jingdonlang U president bad General Secretary ka KSU Mawlai Circle kumjuh ruh ki dkhot na ki Unit bapher ba pher ka KSU Mawlai. Lah ia don ryngkat lang ha katei ka sngi da I President bad Secretary Seng Longkmie Mawiongrim ha ryngkat ki dkhot jong ka.
Ha shwa ban plie pyrda lah don ka jingialang lyngkot ba la pyniaid da U Samla Alfred Dkhar, Finance Secretary Mawiongrim Unit bad lah ioh ka kyntien kren pdiang na U Samla Damayan skhmiew, President ka KSU Mawiongrim Unit . Haba ai jingkren ha katei ka sngi plie ia ka sem ap kali U President ka KSU Mawlai Circle Samla Biangbor L.Paliar u la ong ba ka jingbet ka KSU Mawlai Circle ia u symbai hapoh ka Shnong Mawiongrim naduh ki hynniew tylli ki snem mynshwa ka la lah shisha ban pynmih ia u soh uba bha lyngba ki kam jong ka.
U la ban jur ruh ia ki para dkhot na katei ka Unit ban long kiban ia trei shitrhem ha ka liang ban kyntiiew ia ka imlang sahlang ha shnong ha thaw bad ia ka Ri bad Jaitbynriew. Ka jingplie ia kum kane ka jaka ap kali ka long ka jingmyntoi ia ki paid nong shong shong baroh kawei.U General Secretary U Samla Rapborlang Nongrum u la iai iaroh shikatdei ia ki dkhot jong ka KSU Mawlai Mawiongrim Unit, watla ha I bor I barit ki la lah ban pynieng ia ka sem ap kali kaba long ka jingmyntoi ia baroh ki nongshong shnong. I President jong ka Seng Longkmie Mawiongrim I Kong Valentina Shullai I lah ai ka jingiaroh ia ka jingtrei shitom ka KSU Mawiongrim Unit kaba lah ban wanrah shisha ia ka sem ap kali. I lah kular ba na ka liang ka Seng LongKmie ka long kaba kloi ban ai ka kti kamon kti kadiang ia ka Seng ha kano kano ka por ba ki sngew donkam.
U President Rangbah ba ha khliehduh jong ka KSU Seng kmie ym lah khlem da ai ka jingpyrto ia ka KSU Mawlai Mawiongrim Unit. Ka jingplie ia katei ka sem ap kali ka long tang ka jingsdang iba rit, wat hapdeng kiba bun ki jingeh kiba ki iakynduh. Ka KSU Mawlai Mawiongrim Unit ka ieng rangbah ban iaid shakhmat ha ki jingtrei kam jong ka. U Samla Daniel Khyriem u lah kren ba ka jing kharoi ki jingsniew bapher bapher hapoh ki shnong ki thaw bad hapoh ka Ri baroh kawei ka dei kaba ngim lah shuh ban len ha kine ki sngi kiba mynta.
Ban rat dyngkhong ia kine kiei kiei baroh donkam ka jingiatrei lang na baroh ki liang kum ka Dorbar Shnong, Seng Samla Shnong, Seng LongKmie khnang ba ngin iohi ba ki khun Samla ka Ri kin lait na kiei kiei ki jingmlien ba sniew kiba wan tyllep ia ka Jaitbynriew ha kine ki sngi ba mynta. Haba kren kyllum u lah ong shuh shuh ba ka KSU kam don jingeh ban ai ia ka jingiatreilang la ka long ha kano kano ka bynta donkam ia ka jingia sngewthuh jingmut bad ka jingia kyrshan lang kawei ia kawei pat. Ha shwa ban pynkut la ioh ka jingkren ai khuble na U Samla Mac Donald Jitem, General Secretary ka KSU Mawlai Mawiongrim Unit.
