Shillong, Lber 30: Ka tnat Telecommunications (DoT), Northeast License Service Area (LSA) ka la pynlong ia ka seminar ai jingtip mynta ka sngi hapoh ka thup “Electromagnetic Radiations from Mobile Tower” ha Shillong.
La pynlong ia kane ban ai jingtip ia ki paidbah shaphang ka jingdonkam ia ki mobile tower khnang ban pynlong ia ki jylla ka thain shatei lammihngi kiba la iaid shaphrang ha ki kam digital bad ban weng ia ki jingsngewthuh bakla shaphang ka jingktah ka EMF kaba mih na ki mobile tower ia ka koit ka khiah.
Ha ka jingkren jong u, u A.K Jain, DDG (Compliance) u la batai shaphang ka jingdonkam ia ki mobile tower bad ka bynta jong ki kam telecommunications ban pynbiang ia ka jingiasoh kaba pura.
U la kren shaphang ki jingsngewkhia jong ki briew da kaba ong, “Na ka bynta ka roi ka par bad ka ioh ka kot, ki kam telecom ki long ka nongrim da kaba pynbiang ia ka jingiasoh jong ki mobile tower ban kyntiew ia ka jingiasoh hapdeng ki briew.” U la ong ruh ba kam don kano kano ka jingktah ia ka koit ka khiah jong ki briew haba ki iadei bad ka radiation kaba mih na ki mobile tower.
U la pynshai ruh ba ka jingpyndonkam ia ki jingshakri telecom lyngba ki SIM card jong kito kiba pyntreikam ha kiwei kiwei ki ri ka long kaba beain katkum ka Indian Telegraph Act 1885 bad ba kito kiba leh ia kane ki lah ban shah pynshitom katkum ki kyndon ka Indian Telegraph Act 1885 bad kiwei kiwei ki ain bad ki kyndon kiba iadei bad kane. Kumta u la kyntu ia ki briew ba kin ym pyndonkam ia kum kine ki SIM card lane ki signal na kiwei kiwei ki ri haba ki don hapoh ka ri India.
U Ravi Goel, Sr. DDGDoT, Northeast LSA, Shillong u la batai shaphang ki kam jong ka NE LSA. U la ong ba ka World Health Organization (WHO) ka la kdew sha kumba 25,000 tylli ki jingthoh kiba la mih ha kylleng ka pyrthei ha kine ki 30 snem ba la dep bad ka la wad bniah na ki jingthoh ki stad science shuwa ban rai ba ka radiation na ki mobile tower kam don kano kano ka jingktah ia ka koit ka khiah jong ki briew.
Ha ka jingkren shaphang ka EMF bad ki kyndon, u K. Sri Krishna, DDG Mizoram u la ong “Ka Sorkar India ka la batai shai shaphang ki kyndon kiba iadei bad ki jingmih na ki mobile tower bad namar kane, ka India ka dei kawei na tang katto katne ki ri kiba don ki kyndon kiba pyrkhing bha ha kaba iadei bad ki mobile tower.
Ka DoT ka bud ia ki kyndon kiba khlain 10 shah ban ia kito kiba batai da ka ICNIRP bad kumba la bthah da ka WHO. Ka DoT ka peit man ka por ia ka jingpynmih EMF na ki tower ha kylleng ka ri bad ka pynthikna bay m don ba pynkhein ia ki ain bad ki kyndon ha kaba iadei bad kane.
Baroh kiba ai jingshakri telecom ki hap ban pynthikna ba ka radiation na ki mobile tower (BTS) kam tam ia u pud bad buh ia ki briew ha ka jingma. Ka LSA ka pynlong ruh ia ki audit jong ki jaka da kaba test ia ka signal EMF ha ki jaka bapher bapher kiba jan ia kine ki jaka trei.
Ka long kaba donkam ban weng ia ka jingsngewthuh bakla shaphang ka jingktah ka Electromagnetic Field Radiation (EMR) kaba mih na ki tyllong bapher bapher, khamtam ki Mobile BTS antenna bad ki mobile phone. Kumta, ki briew ki dei ban shaniah ia ka jingshem katkum ka science ba ym don jingma na ka EMF radiation kaba mih na ki mobile tower.’’
U Dr Arun Chougule, Senior Professor & Head Department of Radiological Physics SMS Medical College & Hospitals, Jaipur uba la iashim bynta ha kane ka seminar u la ong “ Ka EMF radiation kaba mih na ki mobile tower antenna bad ki mobile handset ka dei ka low non-ionizing RF/Electromagnetic energy.
Katkum ka jingwad bniah ki stad science halor ka jingktah ka radiation na ki mobile tower ia ka koit ka khiah, la lap ba ka low powered, non-ionizing radiation kaba mih na ki mobile tower kam ktah eiei ia ka koit ka khiah jong ki briew.
Kumta ka long kaba donkam bha ban pynsangeh ia ka jingbatai bakla ha kane ka kam bad pyni ia ka jingshisha. Ka long ruh kaba donkam ban sngewthuh ba kam don kano kano ka jingshem katkum ki stad science lane ki nongai jingsumar kaba pynksan ia kane ka jingong pyrshah ia ki mobile tower.’’
U Ravi Goel u la ong ba ka India ka donkam shuh shuh ia ki tower ban pynurlong ia ka Gati Shakti bad ka jingthmu Digital India jong ka Sorkar Pdeng.
Katkum ka Mobile Economy Report 2022 ka GSMA, ki connection 5G kin tam ia ka 1 billion ha u snem 2022 bad 2 billion shuwa u snem 2025. Shuwa ban kut u snem 2027, ka 5G kan don ka bynta kaba kumba 39% jong baroh ki connection mobile ha India, ha kaba la antad ba yn don kumba 500 million ngut ki briew kiba shim ia kane, u la ong.
Ki jingsngewthuh bakla jong katto katne ki briew shaphang ka jingktah jong ka EMF radiation kam dei ban pyndam ia ka jingshisha kaba mih lyngba ka jingwad bniah ki stad science. Ki jingshem jong kine ki jingwad bniah ki pyni ba ym don kano kano ka jingktah ia ka koit ka khiah namar ka EMF radiation.
Shuh shuh, phra tylli ki High Court jong ka India ki la rai kumne hi bad ki la ai ia ki rai kiba thmu ban pynshai shaphang kine ki jingngeit bad ki jingbatai bakla kiba buh ia ka roi ka par bad ka ioh ka kot jong ka ri ha ka jingma. Kumta, ki briew ki dei ban sngew shngain ba kano kano ka jingkhuslai shaphang ki mobile tower ka long ka bym don nongrim.
La pyntip ha kane ka seminar ba naduh u snem 2021-22 haduh mynta, ka NE LSA ka la test 2400 BTS naduh u Iaiong 2021 haduh u Lber 2022 bad la shem ba baroh ki BTS ki bat ia ki kyndon ka DoT halor ka EMF radiation.
Baroh ki jingtip shaphang ki mobile tower ki don ha ka website jong ka DoT https://dot.gov.in/journey-emf bad ka portal http://tarangsanchar.gov.in/EMFportal, ha kaba ki briew ki lah ruh ban ai jingkyntu ban pynlong ka test ia kano kano ka mobile tower hajan jong kid a kaba ai ka jingsiew kaba malu mala.
