Shillong, Nailur 21: Ka jinglehnian Durga Puja mynta u snem kan sdang ha ka 26 tarik mynta u bnai bad kan kut ha 1 tarik Risaw u bnai ban wan. Ki jaka lehniah ha kane ka jylla mynta baroh ki don 231 tylli.
U General Secretary jong ka Central Puja Committee (CPC) u JL Das u la iathuh ba na ki 231 tylli ki pandal ha ka jylla, ha Khasi Hills ki don 112 tylli, Jaintia Hills 11 tylli bad ha Garo Hills ki don 107 tylli. Tang hapoh ka nongbah Shillong ki don 64 tylli bad ha Tura ki don 24 tylli, ki riew shimet kiba kwah ban buh pandal mynta u snemki don 9 tylli.
Haba kren ha ki nongthoh khubor mynta ka sngi la ong ba ka CPC mynta kala dap 25 snem naduh ba la seng ia ka ha u snem 1993 bad ha kane ka jingdap 25 snem kan rakhe ia ka jubilee rupa da ki programme bapher bapher baroh shisnem lynter bad kin pynkut ha u Nailur jong u snem 2018.
Na ka liang jong ka CPC kan ialeh ban khot ia u Vice President jong ka Ri India ha ka sngi kut jong ka jingleh kmen. Ha pdeng kane ka shisnem kin don bun ki kam kiba ka CPC kan leh. Na ka bynta kane ka Puja kaba mynta kin pynlong ha ka 23 tarik mynta u bnai ia ka jingiakynduh lang jong baroh ki jaid niam. Ha kane ka sngi la don lang u president Naba Bhattacharjee, working president u Ramsevak Singh bad kiwei kiwei de ha kane ka sngi la pynlait paidbah ruh ia ka Logo jong ka jingdap 25 snem ka CPC.
