Nongpoh Iaiong o1 : Ka jingwan jyllei palat ki briew kiba nabar ban wan kamai kajih bad ban trei ban ktah ha ki shnong jong ka them Ri-Bhoi bad ha kiwei ki jaka. Ka Hynñiewtrep National Youth Front (HNYF),Northern Region, ka la pynpaw ia ka jingsngewkhia halor kane.
Haba iadei bad kane, na ka liang u president katei kaseng, u Bah Banpynskhem Kharnaior, u la buh ia ka jingmaham ba baroh ki briew kiba nabar hynrei kim dei pat ban sah ne shong shnong.
Ha kajuh ka por, ka seng ka kyrpad ia ki Rangbah Shnong,ki nongialam shnong ha them Ri-Bhoi ba kin sngewbha ban long kiba peitngor bha ia ka jingwan shong shnong ki briew kiba nabar ne kiba wan ban die ia ki mar ki mata jong ki, kawei ruh khnang ban pyllait na ka jingshongkha khleh.
Ka jingpynmih ka seng ia kane ka jingmaham ka dei halor ka jingshah kynnoh jong uwei u bar jylla ha kine ki sngi, ha kaba u la leit hikai na ka tnat ophis sorkar kaba dei peit ia ka jingrikhñiang bad ban thaiñ jaiñ na ki ksai kiba mih na ki met jong ki khñiang ha ka shnong Kdonghulu, Ri-Bhoi district, hynrei u tei u bar jylla shuwa ban ai training, u la khot pynban ia ki kynthei khasi ban phah shet ja shet jhur ha ïing ba u shong u sah, kaba la wanrah ia ka jingartatien ia ki nongshnong shnong kiba la iohi ia kane bad kiba la pynlong ia ka jingthwet ia une u briew, ha kaba na ka liang ka seng hadien ba la ioh jingtip ia kane, ka la pyrshang ban pynlong ia ka jingthwet, hynrei utei u bar jylla u la phet noh na katei ka jaka bad um shym la wan shuh ban bteng ia katei ka jinghikai thaiñ jaiñ.
U bah kharnaior u la ong ruh ba utei u bar jylla u la wan sha katei ka shnong ban ai jinghikai kumba ka tnat sorkar ka la bthah ia u, pynban u la pyndonkam ia ki kynthei ban pynshet ja pynshet jyntah ia u, hynrei ia katei ka training pat um pat shym la sdang kat haduh ba la mih katei ka jingshah kynnoh.
Kumta na ka liang ka seng ka maham ia kane ka jingleh ki bar jylla bad kyrpad ia baroh ki Rangbah Shnong ba kim dei horkit hordang ban dang ia shah ia kiba kum kine ki jait bynriew kiba na kiwei ki jylla ban wan shong shnong ne wat ban shong ïingwai, da kaba kyrpad ruh ia ki trai shnong kiba don ki ïing wai ba kim dei ban aiwai ia ki ïing jong ki sha ki bar jylla.
Ka seng kam lah khlem da ai jingiaroh ia ka sor Mairang, kaba ha kine ki sngi ba mynta ka la pyntreikam ia ka aiñ ban ym ithuh ia ki bar jylla hapoh u pud u sam jong ka shnong bad ba ki trai shnong kim bit ban ai jaka shong jaka sah ia ki bar jylla, u la pynkynmaw ruh ba katei ka sor jong ka jylla ka maham ruh ia ki samla kynthei bad ia ki longkmie ba kim bit ban shongkha bad ki bar jylla, lym kumta ki bor shnong kin ym ithuh shuh ia ki kum ki trai shnong lada ki ia shongkha bad ki bar jylla, u la ong u bah Ban pynskhem.
Ha kawei pat ka liang, U bah Ban pynskhem u la ong ruh ba ka seng ka ai khublei ia ka Khasi Hills Autonomous District Council (KHADC), ha kaba ka la pynmih ia ka aiñ ban ym ai trading license shuh ia ki bar jylla nangne sha khmat,kaba long ka rai rangbah jong ki nongmihkhmat bad ki dkhot katei ka Council na ka bynta ban kyntiew ia ka roi ka par bad ka ioh ka kot jong ki trai muluk trai jaka.(SP News)
